I e tika COVID-19 neibynta ki paidbah hapoh ka District West Jaiñtia Hills lyngba ka chnat i chait i khiah ya kiwa da palat 45 snem i rta dang lai ko chakhmat katni heiwa ha chnong Jowai da sdang da ka Vaccination Drive nadooh ynnin ka sngi heiwa ki bru yong i chait i khiah da lai mih ki cha ki thaw wa da booh kyrpang wow e ya ini i dawai ha ki dong ka chnong Jowai.
Ha ini i e tika paidbah, kiwa wan chim tika da rah ki deilang ki kot pynsakhiat kam ka EPIC, Aadhaar, PAN Card, ki kot Pension, ka Driving License wa kiwi neibynta wow Register.
Hadien wa yoh tika hap ki wow chong chwa chipor yow pyntikna wa ym em ktah i dawai dei wym poi pyrkhat.
Boon hi napyrdi ki manbei manpa wa wan chim tika, pynsñiaw ki yei kyrmen heiyatoh wa ini i dawai wada pynkhreh daka sorkar, wei ong ki leh wa mar ya yoh yutip ki wow em i e tika, man ki kiwa smat u lai mih khlem iwon iwon i artatien neibhah wada yoo nongmuna ki ya kiwi wa da yoh chwa.
Heiyatoh wa i wan ki paidbah wow chim tika haka District, neiliang u DC ka West Jaiñtia Hills khana u hawa sdang duna bha kiwa wan chakhmat wow chim yei tika, neitæ hadien wa ku won kiwa yoh ya u khñiang hapoh ka District, da sdang boon kiwa wan chakhmat heiwa du ynnin ka 26 tarik da em 1293 ngut kiwa wan chakhmat nadooh kiwa chim yei sien wa nyngkong wa 93 ngut kiwa chim yei bhah wa ar.
