Hadien wa pynmih hukum ki bor District ynnin ka sngi wow khang lut ya ki yaw ha Iawmusiang, Jowai ynne ki dukan ha kini ki yaw da man ki kiwa khang lut.
Ki yaw wa da rai wow khang toh ka Iaw Chyiap, Iaw Chor, Iaw Seiñraij wa Poh Iaw (najan ka Iawmusiang Shopping Complex).
Ynne i step neiliang ki bor District chirup wa ki bor chnong ka Tympang Iawmusiang da uiñ ki ha Iawmusiang wow khang ya ki bru kiwa mut wow chongdai ha kini ki yaw wa da khang.
Ya ini i rai wow khang ya ki toh neidaw wa ki bru ym bood ki ya ki kyndon wow yada nei poor ka khlam COVID-19.
Hawa yaklam wa ki kattu katni ngut kiwa rah mar wow chongdai, da dap ki dei sñiawsih neibhah wa ymtip ki yei rai wow khang ya ki yaw neibhah wa da pynmih ya ka hukum ynnin i janmiet wei kiwa boon hi wanrah ki ya ki mar wa daw sih daw py’ut kam ki jhoor ki soh wa kiwi kiwi.
Ki dukan wa da chah wow wai toh kiwa ym em haap ha kini ki yaw kam ki dukan dai mar-baam wa ki dukan dai dawai.
