Ynne ka 3 tarik, ki kynhun yong ki waheh chnong wa ki VDP chnong kiwa haap haki khappood yong ki ar tylli ki jylla Assam wa Meghalaya, wa kynthup ya u waheh chnong Samasi u Siving Salahe, u waheh chnong Mooriap u Pynbna Pakem, u waheh chnong Lakasein u Lut Tangliang, u waheh chnong Umkyrpong u Apmit Pakem, ki dkhot chnong Mynthning u Bal Sukhlain, ki dkhot chnong ka Jalaphet Bri Sumer u Lambha Chyrmang wa waroh ki VDP yong kini ki chnong haneiñ, kiwa lai chaka thaw wa khappood yong ka Meghalaya wa Assam ha wah Kupli wei da chem ki wa dang boon ki bha ki baar jylla wa wan psiah tooh chapoh ka jylla Meghalaya wei dang em leh ki Dkhar kiwa dang em ha katai ka thaw khappood kiwa dang sah kreh ha tymbud yong ka wah Kupli, nadooh ka Iashem Um, Lisiaw, Rngan, Dumrkhat, Chnong Kseh hadooh Tyrthoo. Kini dang haap ki hapoh yong ka chnong Lakasen, Mooriap, Umkyrpong wa Kseh.
Ha kani ka sngi ha i lai sylli ki waheh chnong waki VDP yong kini thaaiñ kiwa haap hapoh ka Sirdar Sumer Elaka, da keh da i thmu wow ya ksohkti lang wa ka sorkar hei wow yada na i yoh psiah yong uni u khñiang kjut COVID-19 chapoh ki chnong ki thaw kamjooh yaka jylla Meghalaya hi waroh kawi.
Da ong wa i eh yaki para marjan chnong toh neidaw wa kini ki baar jylla kiwa na Assam kiwa wan leh cha ka jylla Meghalaya yong i lyngba ka wah Kupli, neibhah wa kini ki bru lai yaw ki cha Sokilo, Khliehriat, Ladrymbai ter tre kiwa da lai heipor miet kamwa 9 waje chaneiñ. Kini ki baar jylla da lai ki lyngba ka chnong Umkyrpong, Mooriap, Samasi wa kiwi kiwi ki chnong wa marjan.
Kamtæ hajrong ini, neiliang yong ka kynhun yong ki waheh chnong wa ki VDP da kyrpaad ki yaka sorkar wow sñiawbha u chimkhia lada man ko iwa ye wow kyrriah noh ya kini ki baar jylla na kini ki thaw wow phah lai noh ya ki cha jar jiar ki chnong yong ki, khnang wow ye u yada nei psiah kulmar yong ki bru wei kamjooh leh ya u khñiang kjut COVID-19, da kyrpaad leh wow pynbiang yaki pulit wow sñiawbha wow lai sonteri ki cha kini ki thaw khappod kiwa da kdaw haneiñ kiwa man kam ki thaw wa yachem ki bru wa na Assam wa Meghalaya.
Discussion about this post