Ka jylla Meghalaya ynne ka sngi da ye ko wow pyndep yei pyndur namo ka Dry Run yei e dawai yada na u COVID-19 deiwa leh ya ini ha Ganesh Das MCH Hospital, NEIGRIHMS Hospital, Rynjah State Dispensary, Nazareth Hospital wa ha Holy Cross Hospital heiwa da chimbynta da 129 ngut ki bru.
Da wan sakhi ya ini da u Sampath Kumar, Principal Secretary, Department of Health & Family Welfare, ka sorkar Meghalaya uwa da lai cha NEIGRIHMS wa Ganesh Das MCH Hospital heiwa ki wakreh ka chnat i chait i khiah da pynyoo ki thij ki kyndon wa hap ki wow bood. Neiliang ki sahep ka chnat i chait i khiah da em Dr. H. Giri wa Dr. Manners kiwa pait leh yei leh ya ini deiwa emlang u Dr. Bhattacharya, Director, NEIGRIHMS wa Dr. Roy, wa mihkhmat yaka WHO.
Ha waroh kini ki thaw da sdang deiwa sait chwa ya ki kti, iwa pynbood won sa u Vaccination Officer 1 uwa pyntikna ya kiwa yoh myntoi toh kiwa em pyrtuid wei hadien ini da yah ya kiwa yoh myntoi cha i thaw wa em u Vaccination Officer 2 uwa da pynemkaam daka CoWIN App (COVID Vaccine Intelligence Network) yow pyntikna chooh chooh ya kiwa yoh myntoi. Hadien ini da yah ya kiwa yoh myntoi cha i thaw wow e dawai heiwa uwa e Inject namo u Vaccination Officer da bood u yaki kyndon wa da booh hawa e ya ini i dawai heiwa ha kani ka Dry Run da pyndur hi-eh ym em pu em e da i dawai. Ha kani ka kamra da booh ya ki dawai wa kiwi kiwa emkaam lada jia iwon iwon iwa ym poi pyrkhat ya kiwa yoh dawai.
Hadien wa yoh ya ini i dawai, daw pyndap hapoh ka CoWIN App wa da dep e ya ini i dawai wei da yah ya kiwa da yoh myntoi cha i thaw wa em ki ar ngut ki Vaccination Officers kiwa daw ya syllok wei daw pait wa kammon man hadien wa yoh ya ini i dawai deiwa yang 30 minit. Kini leh toh kiwa daw embynta wow pynbait pynryntih ya ki bru wa wan.
Daw saam leh yaki kot ki sla wa hap puræ kiwa yoh myntoi yow tip ki chaphang i dawai wei yei emkaam wow bood yaki kyndon yada na u COVID-19.
Lada em iwa jia iyi re iyi ya kiwa yoh dawai, yaka yutip chaphang kiwa yoh myntoi daw thap hapoh ka SafeVac. Lada won ym em iwon iwon i dak i chin wa mih, kiwa yoh myntoi daw yoh ki wow liwan tangwa da hap ki wow wan biang hadien 28 sngi yow yoh sa i Inject iwa ar katkam ki kyndon wa da booh daka sorkar.
Waroh kiwa da yoh yei dawai Vaccine daw e cha ki da ka Digital Certificate kiwa daw yoh naka CoWIN App. Daw phah leh ya ki SMS cha kiwa yoh myntoi yow pynkynmoo yaki yaka sngi wa i por wow wan ki yaka Inject wa war kamjooh heiwon i thaw.
Kani ka pyndur e dawai da man ko kawa jop kawa lai bait ynne ka sngi iwa da e mynsien leh ya ki wakreh manda sdang wow e da i dawai.
