Ka Lympung Ki Khynnah Seng Khasi Seiñraij ha uni u snem daw pynman ko ya ka Lympung ki khynnah ha ka 18 wa 19 tarik uni u bnai ha Pynursla, East Khasi Hills.
Ynne ka sngi hapoh i yahkhmat u President ka seiñ uwa man leh u Dolloi ka Elaka Jowai, u Puramon Kynjing, u General Secretary ka Seng Khasi Riwar Mihngi, u Robarlin Suting da lai pait ki yei pynkhreh neibynta kani ka Lympung.
Neiliang u Puramon Kynjing da ong u wa kani ka Lympung ki khynnah toh kawa 19 wei u man ko nadooh ka 18 wa 19 tarik uni u bnai deiwa kyntu ya kiwa chimbynta wow wan heipor wa biang iwa man hapoh 9:00 waje i step.
Da kyntu u leh ya kiwa wan chimbynta wow man kiwa leh khooid deiwa ymhoi wow noh khiar ki ya ki jhep khamtam ki Plastic kat chawa yoh neibhah wa da hikai wow man kiwa yada ya ka bei ramaw wei i burom kylliang.
Heijooh i por da ong u wa kani ka Lympung toh kawa daw pynlai wei pynkrehkaam du da ki khynnah donhi deiwa kitbok ya waroh kamjooh.
U Robarlin Suting uwa man u General Secretary ka Seng Khasi Riwar Mihngi da ong u wa ha ka 17 tarik man ko kawa kyrpang heiwa daw wan ki khynnah wow e sikai ya ki khynnah.
Da e khublei u leh ya ki chnat sorkar nadooh ka PWD, ka PHE, MeECL wa kiwi ki chnat wa da kreh wow pyntoh pyntne ya kani ka Lympung.
Uwa e buit ka Seng Khasi Riwarwar Mihngi, u Control Marbaniang da khut u ya waroh wow wan chimbynta cha kani ka Lympung wow yoh ki yei chah hikai wa paka.
Da kitbok u leh ya waroh kiwa wan cha kani ka Lympung wow man kawa phooh wa phieñ dei wan wei lai liwan deiwa suk.
Discussion about this post