Jowai: Ka pynkreh yaka Election chiteiñ samoi neibynta ka 26-Shella Constituency da man ko kawa lai bait wei da kut leh i por yalap Election ynnin ka 19 tarik heipor 5 waje i janmiet wei ka thap Vote u man ko mynstep ka 21 tarik wei ka niaw Vote won u pynman haka 24 tarik.
Ya kani ka Election chiteiñ samoi da pynman hadien wa khlaad noh u Dr. Donkupar Roy wei ki kyrtong wa da yieñ wow yakhun da em ki 6 ngut wa kynthup ya u khon u Dr. Roy u Balajiedkupar Synrem (UDP), Joshua Warjri (BJP), Mosjo Rockfeller Wanswett (PDF), Batynshain Laitmon Ryngnga (INC), wa arngut ki kyrtong samen ka Grace Mary Kharpuri wa u Komen Laitmon.
Neiliang u Chief Electoral Officer ka Meghalaya u FR Kharkongor da pyntip u wa ha kani ka Election daw pynemkaam ya kiwa boon jait nadooh ki muna, ki khulom wa ym ktah yaka rymaw kiwa em deilang wa ki symbe dieñ wa kiwi kiwi wei da pynyieñ leh ya ki Signboard kiwa khang yow pynemkaam Plastic yow pynman ya kani ka Election kam ka Green Election.
Waroh kiwa thap Vote da em ki palat 29,000 ngut wei ki Polling Officials da mih ki nadooh ynnin ka sngi hadooh ynne ka sngi wei da em leh ki thaw wa jngai wa da hap ki wow lai kjat kam cha Nongriat, Umblai, Ku Nongrim, Sohkhmie wa cha Kalatek Polling Station kawa ye u poi du deiwa pynemkaam da ka lieñ.
Discussion about this post