I thap Vote jied President thymme ka seiñ Jaiñtia Hills Truck Owner’s Association (JHTOA) lyngba ka Secret Ballot da pynman ka ha ka 2 tarik uni u bnai hajan ka Toll Gate 7-Mer (Ialong) West Jaiñtia Hills District, hei pynlai u muktiar, u Marbhahki Rymbai wa u Chairman kani ka Election, u Smen Kyndait, heiwa da man ko kawa lai bait lai ryntih, wei kiwa thap Vote leh da yamih chimbynta chongchit ki u wan thap ya ka Vote yong ki deiwa yieñ laiñ yow poi ka pali neibynta u jied ya u President wa thymme.
Ya kani ka kaam President da em 4 ngut kiwa yakhun wa kynthup ya u Balen Thubru, u Nangaibormi Sutnga, u Heibor Siangshai wa u Washing Roy Rymbai.
Hadien wa dep u niaw Vote da jop da u Balen Thubru uwa da yoh 128 Vote.
U Balen Thubru hadien wa chah jied kam u President thymme da kular u wow e i chakri met wa mynsien wei deiwa khooid suba neibynta i myntoi ki tre Truck wa kiwa yah Truck.
Wei hawa mut u wow leh ya iwon iwon, kular u wow leh deiwa yatiplang khlem iwon iwon i arsap. Heijooh i por kyntu wei khut u i yakrehlang para dkhot neibhah deiwa man kiwa yatylli ye u jop ya iwon iwon i dawa.
U Balen Thubru da e khublei u leh ya waroh kiwa embynta u pynlai bait pynlai ryntih ya kani ka thap Vote, kawa da angnood bha kiwa boon ki tre Truck wa kiwa yah Truck u pyndep noh ka. Da kyntu haroh u ya ki tre Truck wa kiwa yah Truck u chimkhia ki wow wan chimbynta haka yalang yong ka seiñ khnang yow jop ya iwon iwon i eh i khoo.
Da pynsñiaw haroh u wot hapyrdi i em boon ki seiñ leh, tangwa lada yoh sakhiat ya uwa yahkhmat wa sakhiat, yooluti u wa ki paidbah leh u em ki i yatylli ha waroh ki liang.
Discussion about this post