Ka lehniam Durga Puja yong kiwa ngait niam Hindu kawa jooh pyndep chisien chisnem da man ko kawa lai bait ha uni u snem ha Jowai ya kawa da pynman ha Shiv Mandir da ka Sarbajan Durga Puja Committee.
Ynne ka sngi da sakhi wa kani ka lehniam da man ko kawa lai bait deiwa bood ya ki kyndon Standard Operating Procedure (SOP) wow yada nei poor ka khlam COVID-19 heiwa ha ki thaw psiah da chah chibhah chisien wow lai cha ka Mandir heiwa da sylli ya ki bru ya i chit yong ki kamjooh leh da siat dawai Hand Sanitizer leh ya ki langhoh kti yong ki wei da pynkhreh leh ya ki Mask neibynta kiwa wan khlem ki Mask.
Da sakhi wa wot wow psiah chapoh ka Mandir leh da chah chibhah chisien khnang wow lait u khynnia hapoh ka Mandir wei ha uni u snem leh da sakhi wa ki dukan dukdoh kamwa jooh em nachwa ym em u booh ya ki khnang wow yada nei poor ka kjut khlam COVID-19.
Neiliang u Dolloi ka Elaka Jowai, u Puramon Kynjing leh da lai sakhi u ya kani ka lehniam ha kani ka Mandir heiwa da heiwa da e khublei wei da kitbok u ya waroh kiwa ngait niam Hindu wei da kyrmen u wa deiwa pyndep ya kani ka lehniam daw ye u beh ya iwa sih waroh hi-eh.
U S. Chakravarty, uwa man uwi na ki Muktiar (Advocate) na Jowai hawa klam neibynta ka Durga Puja Committee Jowai (Shiv Mandir) da pyntip u wa ya kani ka lehniam ha uni u snem da leh katkam ki kyndon wa da booh da ka sorkar khamtam kam heini i por wa em ka khlam COVID-19 khamtam deiwa pynduna ya ki bru wow psiah chapoh.
Da e khublei u ya ki bor District kamjooh leh ya ki pulit wa ki Volunteer wa da yarap wow pyndep ya kani ka lehniam wei da pyntip u wa heipor wa pynngam-um (Immersion) ya ka Blai ha Wah Myntdu ym lai paidbah kamwa jooh heiwa daw chah du kamwa 20 hadooh 30 ngut wei u lai leh toh dei kari hadooh wa poi i thaw.
