Hadien wa da boonsien da mih i kulmar hawa pynman Public Hearing ka Star Cement hadooh wym yoh tang u pynman leh, ynne ka sngi won da pynman sa kawi ka pynsñiaw paidbah namo ka Public Hearing neibynta ki kaam thymme ka Star Cement kawa da pynman ha chnong Lumshnong, East Jaiñtia Hills hajrong i thmu wow pynheh ya ka paar tih moochuni ka karkhana Star Cement ha i thaw thymme wa heh 70 Hectare iwa em hapoh u pood ka Lumshnong hi. Katwa ka Public Hearing wa bood won wa pynman heijooh i thaw toh yow pynheh yei bor pynmih Clinker, Cement waka Waste Heat Recovery Boilers (WHRB) deiwa pynkrehkaam da u Line-II.
Ini i thmu ka karkhana toh wow pynku ya i tih moochuni na ka 9 Lak MT cha ka 25 Lak MT ha ka chi snem.
Heiyatoh wa ka pynheh paar tih moochuni:
Neiliang u Waheh Chnong ka Lumshnong da ong u wa em chiboon ki kaam wa kani ka karkhana da leh ko neibynta ka chnong wei dang em leh ki kaam wa dang sahteiñ heiwa da khana u wa ha ka Dorbar ka Chnong da rai ko wow pdiang ya i thmu ka karkhana.
Neiliang kiwa kitkaam ka dorbar chnong kamjooh ki dkhot ka Executive Committee ka chnong da kyrchaan ki ya ini i thmu ka Star Cement.
Da pynsñiaw ki ya ki myntoi wa da yoh ki paidbah ka chnong nadooh ki puræ puthi, i chna ya ki luti syngkieñ, i yoh kreh wa kiwi kiwi.
Neiliang uwa mihkhmat ya u Dolloi ka Elaka Narpuh leh da e u yei kyrchaan ya ka Star Cement.
U Leninggrad Tariang, Organizing Secretary ka KSU-JHDU, da ong u wa ka seiñ da pyrchah joor ko ya ini i pynheh ka karkhana kamjooh na u Phanuel Tongper, Vice President KSU Narpuh Circle.
Neiliang u General Secretary ka JSU, u Treiborlang Suchen da ong u wa ka seiñ da pyrchah ko ya ini i thmu wow pynheh ya ka paar da ka karkhana neibhah daw ktah bha ko ya ka rymaw, ya i khih i kreh wa kiwi ki de ki daw.
Ka Rinaroi Bareh wa kiwi kiwa klam na ka chnong Umlong, da ong ki wa neiliang ka chnong wa ka Dorbar Chnong da pynsñiaw ko ya i rai wow pyrchah ya ini i thmu ka karkhana neibhah daw ktah ko ya ka pateiñ wa mynried. Da pynsñiaw ki wa lada yoh ka karkhana wow tih ya i moochuni daw ktah ko ya ka kiwa boon kiwa sah ha kani ka chnong kiwa im nei rep i riang.
U Secretary ka chnong Tongseng da pynsñiaw u yei kyrchaan ka Dorbar Chnong Tongseng ya i thmu kani ka karkhana.
U Lalthangsang uwa man u Secretary ka Khaddum da pyntip u wa ka chnong da kyrchaan ko ya ini i thmu ka karkhana neibhah wa boon i myntoi wa yoh ka chnong na ka karkhana.
Waroh kiwa klam wa pynsñiaw yei kyrchaan wei pyrchah da em ki 86 ngut.
Ha kani ka pynsñiaw paidbah da yoh hadooh 70 tylli ki chithi na ki bru samen wa na ki seiñbhalang kamjooh kiwa da kyrchaan wei pyrchah yeini.
Hadien wa kut ka pynsñiaw paidbah neiliang u Deputy Commissioner ka East Jaiñtia Hills, u Abilash Baranwal da ong u wa ya ka bui (Report) na kani ka sngi daw phah ya ka cha ka sorkar pyrdi wow bichaar ya ka.
Puræ leh: Yoh ka Star Cement yei kyrchaan wow pynheh yei bor pynmih khyndaw-bilat le chah neiwa katni
