Ka Meghalaya Board of School Education (MBOSE) ynne ka sngi nyngkong da sdang pynman ko ya ka Exam SSLC næ Class X, hapyrdi i ku smat kiwa yabi ya ka khlam COVID-19 ha ka jylla, wei ya ka Exam da pynman hapyrdi i pynrkhiñ wei bood ryntih ya ki kyndon kamwa da phah da ka chnat i chait i khiah.
Hawa yaklam wa ki kattu katni na kiwa pynlai skur, da pyntip ki wa da pynbiang ya iwa emkaam katkam wa phah da ka chnat i chait i khiah la ha i khooid i suba wei wow pynyoo nongmuna cha ki khynnah wow bood ki ya ki kyndon yong ka sorkar, wei da pynkhreh leh wow e laad ya ki khynnah ki wym ye wow lai thoh ya i Exam na i chah ktah ha ka khlam COVID-19 wa kitu kiwa sah ha ki Containment Zone.
Ka Principal yong ka Smit Higher Secondary School, ka Drissila Mawroh da pyntip ko wa katai ka thaw thoh Exam em ko 765 ngut ki khynnah kiwa yakhun ya ka SSLC, wa kynthup na ki 3 tylli ki skur, tangwa da em leh ki khynnah kiwa pep wow lai thoh ya ka Exam.
Da pyntip wa kamwa man katni, ha katai ka Centre ym em yoo iwon iwon wa em i tieñ yong ki khynnah, tangwa neiliang ka skur leh dq pynbiang ya ki thaw sait kti wa kiwi ki laad wow yada.
Katkam wa pyntip u Joint Director ka MBOSE, u M. Marbaniang ki khynnah kiwa yakhun ya ka SSLC Exam ha uni u snem waroh em ki 65,787 ngut, heiwa da pyntip wa du ha Shillong em ki 15 tylli ki Center wa da pynman ya ka Exam, wei na kini da phiah chooh chooh sa 30 tylli ki Sub-Centre yow lait nei khynnia.
Hawa kylli, da ong u wa ka MBoSE ym pu yoh yutip wa pura hadooh katwon wa wan ki khynnah wow thoh ya ka Exam neidaw wym biang i rukom pynpoi yukheiñ wa em ki thaw ki wym em ki Network kiwa biang.
U Marbaniang da pyntip u wa du ha nongbah Shillong ki khynnah wa lai thoh ya ka Exam SSLC da em ki 98.57%, heiwa da em 9128 ngut ki khynnah kiwa wan wow yaleh wei napyrdi kini da yoh yutip wa 130 ngut ki khynnah kiwa pep wow lai thoh ya ka Exam.
