Ka KSU Wapung Unit ha ka 6 tarik uni u bnai da lai yachem ko ya u Asst. EE Sutnga Distribution Sub-Division MePDCL Khliehriat yow pynkynmoo ya kawi ka chithi wa ka seiñ da dep lai booh ha ka 09-09-2020, heiwa ka seiñ da dep booh dawa wow pynyoh ya u Transformer ha ka chnong Wapung Skur.
Ka seiñ da ong ko wa ini i dawa toh neidaw wa tlot i saam bordiñ ha ka chnong iwa da pynjynjar ya kiwa chong chnong. Ka seiñ da dawa ko wow booh sa uwi u Transformer (200KV) wei ini daw pynsuk i ya kiwa boon wa lang.
Hawa yatoh wa ini, ka seiñ da e ko dei thoh cha u MLA ka thaaiñ uwa man leh u Montri yong ka Revenue & Disaster Management, Social Welfare waka Excise Department, u Kyrmen Shylla wow pynsmat hawa yatoh wow pynyoh ya uni u Transformer. Ka seng da phah ko leh ya ka chithi cha u James Sangma, u Montri ka chnat bordiñ wa cha ka MeECL, Shillong nadooh ka 24-10-2020.
Ka seiñ da kyrmen ko wa ini i dawa wow pynyoh Transformer daw mankaam smat i khnang wow biang i saam bordiñ wei wow pynsuk ya kiwa chong chnong deiwa ya kreh chitom ki sahep wa pait wa u MLA ka thaaiñ.
