Ynne ka sngi u montri rangbah ka jylla, u Conrad Sangma da lai booddien u ya i pynkhreh wow yakhun ya ka khlam COVID-19 ha West Garo Hills deiwa chong yalang wa ka High Level Covid Committee.
Ha ka yalang kawa em leh ki bor ka District wa ki sahep ka chnat i chait i khiah da booddien kyrpang yei man i long heiyatoh wa i pynkhreh wow yakhun ya ka khlam ha Tura.
Da phyllu yillu leh hajrong i man i long ki thaw sumaar wei hadien ka yalang da lai pait leh ya ki thaw sumaar wei rukom wa da pynkhreh ki heiwa da rai leh wow pynboon yei em ka la’ær Oxygen.
Chooh chooh da kyntu leh wow em i yakrehlang ki bor chnong wa ka imlang sahlang hei wow yakhun ya kani ka khlam.
Hajrong wa da phah wow booddien ya i man i long ka khlam, da rai leh wow pynjoor ya i e tika ha ki thaw wa man yaw, i khayi pateiñ, wa ki thaw wa joor ka khlam.
