Lai boodien ka KSU na ka MPSC yei duna kiwa mih pyrtuid na iwa da pynbna lait kreh

Ka Khasi Students’ Union (KSU) lyngba ka Employment Monitoring Cell da phah dorkhat ko cha ka MPSC hajrong ki kattu katni ki ujor wa da yoh na ki khynroo khyllood wa da dep thap kreh waphær waphær wa ki kattu katni ki phang wa toh u pynbha pynwandur hajrong i thung kreh.

Nyngkong heiyatoh wa i kreh Junior Divisional Accountant (JDA) hapoh ka Directorate of Account & Treasuries, Meghalaya neibhah katkam i pynlait Advertisement da em 69 tylli ki kreh wa lait, tangwa heipor wa mih ka Result da mih du 34 ngut.

Heiyatoh wa ini, ka MPSC da pynche wa em du 34 ngut kiwa Pass ya kani ka Exam wei da khut Interview leh ya kini hi ki 34 ngut.

Neiliang u Secretary ka MPSC da pynche u wa ye u man neidaw ka Pass Mark waheh wa da booh neiliang ka Directorate of Account & Treasuries iwa da pynman ya kiwi wym ye ki u Pass neibhah ha kiwi ki chnat sorkar da booh ya ka Qualifying Marks wa du 33 Marks.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Ka phang wa ar wa da yaklam toh hajrong i kaam Typist (Ordinary Grade) ha Meghalaya (Civil) Secretariat & Heads of Department. Wei ya kani da pynmih Advertisement ha u snem 2016 neibynta 36 tylli ki kreh tangwa hadooh katni dang sahteiñ hanlada dadep leh yei Exam waka Typing Test.

Neiliang ka MPSC da pynche ko wa da khreh ko wow pynlait noh ki Result tangwa dang yang yaka Roster ka chnat SAD u phah ko.

Iwa le toh hajrong i thung kaam wa da pynlai da ka MPSC heiwa da chem wa kiwa thap kreh hap ki wow yang hadooh 4-5 Snem yow ye u pyndep lut ya waroh. Kamtæ ka seiñ da ong ko wa toh u pyndep yei thung kreh hapoh chi snem nadooh wa pynmih Advertisement.

Ka phang wa soo toh neibynta ki Grade B, C wa D wa toh u pyndooh noh ya ka Personal Interview neibhah ka seiñ da ong ko wa da yoh ujor ko wa em i pynbaam tangka wei i leh chiliang heipor wa pynman Personal Interview.

Ka seiñ da ong ko wot ka sorkar pyrdi leh da pyndam ko ya ka Personal Interview wei kamjooh leh kiwi ki jylla leh da bood ki yeini.

Kawa san ka phang toh hajrong ka Personal Interview neibynta ki Grade A, heiwa ka seiñ nadooh ki snem wa dadep da booh ko yei dawa wa ka Personal Interview toh u em ki Camera wa riñ dur yow lait nei leh tooh kamwa da sñiaw na ki por cha ki por.

Hajrong kini, neiliang ka MPSC da pynche ko wa chong hei mon yong ka sorkar wow leh yeini wei neiliang ka MPSC ym em ko iyi iyi i pyrchah.