Ka seiñ HANM lyngba ka Land Protection Cell ynnin ka sngi da lai ki cha khappood ka Assam-Meghalaya hajan ka Dam Kupli wa dang haap hapoh ka Moolaber wa Saphai, WJH wow thung moopood wei wow booh Signboard kam chibynta wow yada ya u pood u ang ka jylla.
Ka seiñ da ong ko wa hadooh katni da em 2765.14 Sq Km wa da dep knieh yabor da ka sorkar Assam ya ki thaw yong ka Meghalaya nadooh ki thaw wa em hapoh ka Elaka Nonjngi 11.20 Sq Km, ha Elaka Narpuh 64 Sq Km, ha Block-I ka Jaiñtia Hills 573.54 Sq Km, ha Khanduli ka Elaka Raliang 12.80 Sq Km wa kamtæ ter ter.
Da e nongmuna leh wa ha ka 15-12-21 ka sorkar Meghalaya hapoh i yahkhmat u Conrad Sangma wa u Prestone Tynsong da khut ki ya ka seiñbhalang, ki District Council wa ki seiñ saiñhima waphær waphær wow ya phyllu yatai heiyatoh wa ki kaam khappood tangwa ka Assam da chim kabu ko deiwa hiar cha Mawlangona wow lai thaw, lai woh ya ki thaw yong ka ri Khasi wei lada kamni kammon u ye u chaniah ya ka sorkar Assam wei hajrong ini da rai wow lai booh wei thung hi da u moopood.
Da kdaw leh hawa ka MePDCL da thmu ko wow pynpoi bordiñ cha Mawdiangsnam wa Umyiap, ki pulit ka Assam da pynsangeh ki hadooh wa da hap pyndam u kreh ya kati ka Scheme sorkar neidaw wa u Contractor da chah maham u ha ki pulit ka Assam.
