I pynkhreh ka Balang Presbyterian Barato, West Jaiñtia Hills wow pdiang yaka yaseiñ Synod ka wow man haka 17 hadooh 20 tarik uni u bnai da lai ko chait chait chakhmat nadooh i pynkhreh haki yung ki sem, ha ka Balang wa ka chnong hi waroh kawi. Kani ka yaseiñ da toh u man ko ha u snem 2021 tangwa pep noh ko nei wan pynthut ka khlam.
Neiliang u Pastor wa toh u pait yaka Balang Barato u Rev. D.H. Lamare pyntip u waka Balang da pynkhreh chit rhem ko nadooh mynsien kat i bor wa ye neibynta u pdiang kyllooid mynsien ya kiwa wan yaseiñ kiwa najan na jngai wot kiwa em heiwi won i ngait.
Da kyntu u yaki khon ka Synod wym emkaam ki u khuslai ya kiwon kiwon ki bynta neibhah waka Balang da pynkhreh ko yei emkaam yong ki la heiyatoh i baam i dih katwa ye.
Kamwa ka thaaiñ toh kawa chit, da kyntu u yaki paidbah u rah satri wei u pynkhreh leh ki that siang lane ki kot khubor neibhah waka madan man yaseiñ man kawa laphooh, hanla da pynkhreh chuki leh wym ye won u pynbiang waroh.
Yaka thaw pynyieñ kari da pynkhreh hajan ka madan man yaseiñ, kamtæ kiwa kwah u booh hei thaw wa jan cha madan man yaseiñ toh u poi ki hapoh 10:00 waje i step, neibhah la jia wa dap ka thaw pynyieñ kari hap noh ki u booh rap cha jngai.
Heiyatoh waki sarok wow poi cha kani ka chnong da kyrpaad ya kiwa wan yaseiñ u kohngooh yei pynbait ka Balang khnang yow lait nei sahkut kari.
Kiwa wan na Shillong u psiah ki naka laad ha Ummulong cha chnong Nartiang, Samatan yow poi cha Barato.
Kiwa wan na thaaiñ War, kiwi ki thaw ka West Jaiñtia wa Jowai u psiah ki na laad chnong Pasyih, Mynsoo, Samatan. Kiwa na East Jaiñtia u psiah ki na Phramer ter ter u sarok ka chnong Shangpung, Raliang, Laskeiñ.
Kiwa wan naka thaaiñ Iooksi, Saphai u psiah ki naka luti u poi cha Sahsniang, Muchrot Saba, sa kawi won kiwa wan naki thaaiñ Mynsngat Khanduli u lai ki na u sarok naka laad Namdong, Sanaro.
Ka Balang da khang haroh ko ya kiwa wanrah yaki yudai ha ka sngi Bibar la hei thaw man yaseiñ næ thaw pynyieñ kari wa ki sarok wa dang toh hapoh ka chnong, deiwa ong wa kani ka sngi wymtoh u yadai yathied tangwa ka sngi man yaseiñ.
Hawa kylli lada yoh yarap hi ki mo naka sorkar heiyatoh waki luti syngkieñ, ka umbaam umdih. Da khana wa nadooh wa sdang hi i pynkhreh da lai yachem ki yaki bor sorkar kamjooh kiwa mihkhmat heiyatoh wa ki sarok ki luti syngkieñ la toh dei pyndap yaki thlu ki syar næ u chna pynbha khnang yow suk ki paidbah wa wan yaseiñ.
Neibynta u surok chnong (Internal Road) yoh ki du 1 Km tam, tæ neidaw wa ka chnong man ko kawa heh, ka 1 Km tam ym pu ye ko u pynsuk wei dang em chiboon ki laad ki sarok.
Kamtæ yoo ki wym em por de wei ka sorkar leh yoosar wym ye de ko u yarap yei emkaam wa dang sah heiyatoh u sarok la hapoh chnong lane ki sarok heh wow poi cha kani ka chnong.
Heiyatoh wa ka um ka wah, yooluti ki wa ka chnat PHE u leh ko iyi re yi kamwa da kular u Montri kamjooh ki sahep sorkar, neibhah wa ka umkor lyngba ka JJM ym pu ye ko u poi lut cha ki manyung wada mang.
