Kamwa da jan poi ka sngi ka tayaaw yong ka Chaad Ñiam Behdieñkhlam hapoh ka Raij Jowai, neiliang ki khon ka Loomkyrwiang Dorbar Chnong leh dei sñiaw yaman iwi neibynta i burom u Trekirot, ha ka sngi Pynsin 22 tarik da mih paidbah ki wow ya chimbynta hei krehyonglang kawa tip kam ka Behdieñkhlam Cleaning Drive.
Ha kani ka sngi ki bru wa chong wa sah hapoh u pood u ang ka Loomkyrwiang nadooh ki tredong hadooh kiwa chong yungwai khlem da sñiaw para, da mih ryntih ki wow ya chimbynta hei wow thwat, u daiñ, u lum u pynkhooid pynjngiar ya ki luti syngkieñ, ki umbaam umdih wa em hapoh u pood u ang ka chnong.
Ka Heiioomitre Pakma, Secretary I Khooid I Jngiar, Loomkyrwiang Dorbar Chnong e ko i sñiawngooh wa khroo ya waroh kiwa da embyntalang hei wow pynman ya kani ka sngi kawa jop heijooh i por kyrsu kyrpaad ko leh ya waroh kiwa chong wa sah hapoh u pood u ang ka chnong Loomkyrwiang nadooh ki tre dong hadooh kiwa chong yungwai wow ya krehlang ki hei wow pynneh yei khooid i pliah ka chnong na ki por cha ki por ymtoh du ha ini donhi i por Behdieñkhlam næ ki Soo Sngi Le Yaaw.
Chooh chooh kyrpaad ko leh ya waroh kiwa chong hapoh u pood u ang ka Loomkyrwiang wow chim i kitkhlieh wei wow e yei por wa kordor man-ka-sngi, wow lum wow pynkhooid jiar i khmat yung wei deiwa leh kamtæ, kyrmen, yooluti ko u man i burom wa khroo ya ka dorbar chnong waroh kawi ha ki por kiwa chakhmat.
Discussion about this post