Ka Meghalaya da chah khut ko wow chimbynta ha ka Cities in Transition Biennial, 2023 wa da pynman ha Grenoble, France nadooh ka 8 hadooh ka 11 tarik uni u bnai kam chibynta ka Cities in Transition Network, kawa man ka rynsan wow ya e buit lang kammon da leh ha palat 50 tylli ki sor wa da em ha pyrthai heiyatoh wa i eh i khoo wa da tyngkhooh hajrong ka khayi pateiñ, i long i man ka rymaw, ka imlang sahlang wa kiwi kiwi.
Lyngba i kreh chitom ka sorkar Meghalaya waka yung krehkaam ka Consul General of France wa em ha India, da yoh laad ka sor Shillong kamjooh ka jylla waroh kawi wow pynku yei yatohlok wa kiwi ki ri kamjooh wow ya krehlang yow pynyoo ya ki kaam wa bha wa da ye u leh.
Ya kani ka yalang da pynman da ka City Council ka Grenoble yow yaklam hajrong ki luti syngkieñ, ki kari kamai, ki thaw neibynta ki paidbah kamjooh kiwi de kiwa yatoh waka khayi pateiñ wa i chah ktah ka rym-aw deiwa pynman ya ki Workshop, ki Conference wa kiwi de ki kaam wei yow pynkhlan leh yei yatoh hapyrdi ki seiñ ka imlang sahlang waka sorkar toh kiwi na ki phang wa hakhmat wa da yaklam.
Ka chnong Grenoble toh kawa da yoh yei naam Green Capital ka Europe ha u 2022.
Ya ka Meghalaya da mihkhmat da ka M. Ampareen Lyngdoh, Montri ka Agriculture and Farmer’s Welfare deiwa emlang leh ki sahep sorkar, ki bru wa seiñ khih deiwa chna mar baam, kiwa chna tiar wa ki warep kiwa da ya emlang ha kini ki 4 sngi deiwa chimbynta ha kiwa boon ki yalang wa ki ya phyllu yumut.
Neiliang kiwa mihkhmat ka Meghalaya da yoh ki wow pynsñiaw yei rukom rep wa i rukom yada ki ya ka rym-aw wa da wanrah da ka sorkar kamjooh kiwi ki seiñ kiwa da wan kreh hapoh ka jylla. Ya ka NESFAS kawa da kyrchaan hapoh ka CLLMP da mihkhmat da u Chairman yong ka, u Nestar Kharmawphlang, uwa da khana ya ki jait baam wa i rukom rep ha Meghalaya. Neiliang won ki sahep ka Agriculture Department waka Meghalaya State Rural Livelihood Society da khana ki chaphang ka Organic Mission kamjooh i rukom rep wa khlem da pynthut ya ka rym-aw wa da leh da ki SHG.
Neiliang ka Montri leh da yoh ko wow khana ya ki kaam wa da leh da ka sorkar Meghalaya wa ki thong wow krehlang wa kiwa chong chnong yow pynjop ya iwon iwon iwa da leh da booh thong.
Da yaklam leh ya iwa iyi wa daw ye u ya krehlang mynried mankawi hapyrdi ka Shillong waka Grenoble heiwa u Mayor ka Grenoble da ong wa daw pteiñ yei yaklam wei wow pynyatoh thymme yow myntoi ki paidbah ka Meghalaya.
