Jowai: Ki 18 ngut ki dkhot ka Meghalaya State Kickboxing Association (MSKA) da mih ki wow lai chimbynta ha ka WAKO India National Senior Kickboxing Championship 2019 ka wow pynman ha Maharshi Dayanand Universality Rohtak, Haryana kawa sdang nadooh ka 18 tarik uni u bnai hadooh ka 21 tarik hi uni u bnai.
Haka 15 tarik u Executive Member ka KHADC wa pait ya ka chnat khayi pateiñ wa kiwi kiwi u Paul Lyngdoh ha ka yalang kitbok kit rwiang ya kiwa lai chimbynta, da ong u wa yooluti u wa i yoh takma kiwa yalehke ka MSKA daw ku chooh chooh ki heiwa katni waroh ki Kickboxer ka MSKA da yoh ki waroh 111 ki takma wa kynthup ya 35 Gold Medal, 22 Silver Medal wa 53 Bronze Medal nadooh u Naisphra 2017 hadooh uni u bnai wei da pynmih ka MSKA 17 ngut kiwa lai yakhun cha baar ri leh.
U Paul Lyngdoh da yaroh u ya waroh iwa ki Kickboxers ka MSKA da wanrah naam ki deiwa ong leh wa kam kiwa chimbynta ha ki yakob toh u sai ki ya waroh ki sap yong ki yow ye ki u jop ya kiwa yaleh pyrchah ya ki.
Da ong u leh wa ka yakob ye ko u man pyn wa i ya i hi yow manbru kamwa da thmu i wei kani man ko ka yaleh kawa man ka sngi, kamtæ ha ka yalehke leh uwa yachem pyrchah i toh u ye u wow pynmih ha phi i bor yow ye phi u yakhun kamwa da pynkhreh i yow yoh ya i bor.
U Paul Lyngdoh da kular u leh wow chimkhia ya ka yalehke Kickboxing yow pynku kyrdan ka khamtam wa daw pynman ya ka National Games 2022 hapoh ka jylla wei ha kani ka sngi da e yarap u ya ka seiñ T. 40,000.
Kiwi de kiwa klam ha kani ka sngi toh ka Dr. Streamlet Dkhar, u Dr. Vikash Gupta, uwa e buit ka MSKA deilang u Working President u Lorenzo P Warjri.
Discussion about this post