Ki kynthai ka Tyllilang Basketball Academy da pyntip ki wa daw lai chimbynta ki ha ka nyngkong dooh ka All India Basketball Tournament kawa da e pyrtuid 5X5 Basketball Championship kawa pynman da ka Himalayan International Residential School, Siliguri deiwa ya krehlang wa ka Hoopster’s Hub.
Da ong leh wa kani da man ko kawi na kiwa heh dooh ka Basketball Tournament ha North Bengal kawa daw sdang nadooh ka 24 hadooh ka 26 tarik uni u bnai.
Ki dkhot ka Tyllilang kynthup ki ya kiwa yaleh wa dang khyllood kiwa em yei sap kiwa wan na kiwa boon ki District ka jylla kiwa da pynkreh bha wow lai e reiñ ha kani ka lympung.
Neiliang ka Tyllilang Basketball Academy da pyntip ko wa ya ki yalehke yong ka daw pynyoo kamwa jia (Live) ha ka Facebook Page yong ki, kamtæ da khut ya ki paidbah wow e ki yei kyrchaan.
Da e khublei leh ya kitu kiwa da kyrchaan hei wow pynman kaam ya ini i kamwa da thrang kiwa yalehke yow yoh ki u lai chimbynta yow pynyoo yei sap yong ki.
