Ka KSU-East Jaiñtia Hills District Unit lyngba ka Sports Committee da phah ko ya ka kyrwoh yow embhah, yow ehdaw u khynroo Cleverson Mynthlu uwa da chah jied wow mihkhmat ya ka jylla cha ka yakob yimpa kawa pynman ha Hyderabad kawa tip kam ka 76th Senior National Aquatic Championships-2023 kawa daw sdang nadooh ka 2 tarik hadooh ka 5 tarik uni u bnai.
Ya kani ka yakob da pynman ha Gachibowli Balyogi Sports Complex, Hyderabad hapoh i pait ka Swimming Federation of India.
U Cleverson toh uwa na ka chnong Borghat, East Jaiñtia Hills wei da chah jied u ha ka Meghalaya Swimming Association (MSA) deilang wa kiwi de.
Uni u khynroo toh uwa da yoh u pynlang chiboon tylli ki takma ha ki yakob yimpa wa da pynman da ka MSA wei da yoh u leh 3 tylli ki takma tama ha ka North East Olympic Game 2022.
Ka seiñ lyngba ka Sports Committee da yoh ko leh wow yarap katwa joh i bor hei lai luti uni u khynroo wei da kyntu ko leh ya kiwa mihkhmat ka District wow yarap lang ya oo.
