Ynne ka sngi neiliang ka Jaiñtia National Council (JNC) lyngba ka Employment Commission kawa man kawi na ki chnat krehkaam ka seiñ kawa da booh yow pait yei yoh khih yoh khan yong ki khynroo khyllood, da lai yachem ki markhmat wa u Manager ka Petrol Pump ka Indian Oil ha chnong Mookhep, lad Jalyiah ka East Jaiñtia Hills wow dawa na kani kani thaw thap phniang kari wow thung kreh ko da ki bru ki yong i wow kreh ha kani ka Pump khnang wow myntoi ki bru i hawa em kam kini ki jait thaw deiwa e khih e kreh.
Ka seiñ hapoh i yahkhmat u Nangjan Dkhar, Vice President ka JNC CEC chirup leh wa kiwa kitkaam ka chnong Mookhep deiwa em u Assistant Waheh Chnong, u V. Siangshai da yaklam ki wa u Manager kaani ka Petrol Pump, u M. Rathore wei ha ini i yaklam wa u Manager da kular u wow chimkhia yeini wei daw leh u leh yeiwa emkaam itæ deiwa thung ya ar ngut kiwa kreh ha uni u bnai wow wan nadooh ka 1 tarik, wei da kular u leh wa ka Pump yong ki smat ko u yakrehlang waka seiñ khamtam leh waka chnong.
Neiliang ka seiñ da ong ko wa ha ini i pyrthai dooh kaam dooh jaam khamtam ya ki khon yong ka chnong, katwon pyndap i dei sñiawdiaw wa lada em kam kini ki Petrol Pump, ki karkhana kiwa heh næ wa khian smat ki wow chim ya kani ka kaam wow kyrchaan ya ki khon khynroo ki yong i deiwa e kreh iwa daw man i kyrkhubah ya ka chnong ka thaw wa ka thaaiñ hi waroh kawi.
Tangwa lada ym ye ki u e yei kyrchaan ya ki khynroo khyllood yong i katwon man i i sñiawsih wow yoo wei booh ko leh yei yukylli iyi mynto wow em ki hapoh ka ri yong yong?
Neiliang ka seiñ daw booddien ko yeini wa lada man næ ym man katkam i kular.
Discussion about this post