Ynne ka sngi, kiwa chong chnong ka Khliehmyntriang, East Jaiñtia Hills hapoh i yahkhmat u Bring Dkhar wa u Lektor Dkhar da lai e ki dei thoh cha u Deputy Secretary ka JHADC yow dawa pynman noh ya ka Election jied waheh chnong wa thymme.
Neiliang u Lektor Dkhar da ong u wa ka chuki waheh shnong hapoh ka chnong Khliehmyntriang da man ko kawa thylli nadooh ka 23 tarik u October 2025 wei hawa yaklam wa u Deputy Secretary ka JHADC da kdaw cha oo yei eh kiwa chong chnong wa khlem da em u waheh chnong ym ye de ki u yoh ya ki kot ki sla na u waheh chnong khamtam ya ka Scheme næ ki kaam wa pynkreh ka sorkar.
Neiliang u Deputy Secretary ka JHADC da e u yei kular wow pynsmat ya kani ka kaam neibynta i bha i miat ka chnong Khliehmyntriang waroh kawi.
U Lektor da ong u wa ini i lai e ki dei thoh cha ka District Council toh da i sur kiwa chong chnong wei da soilang leh ya ka chithi yow kyrpaad ya ka District Council wow pynsmat ko yeini i kaam neibhah kam kiwa chong chnong da lai ki da ka luti wa jai-jai heiwa ha ka 24 tarik u September dadep e ki dei thoh cha u Dolloi ka Elaka Jowai wa cha ka Administrative Officer ka Jaiñtia Hills Autonomous District Council yow pynman jied waheh chnong da ka luti kawa khooid lyngba ka Secret Ballot.
Ha ini i thoh cha u Deputy Secretary leh da kdaw wa toh u booh tarik noh ka District Council u pynman yei thap Vote waheh chnong da ka Secret Ballot.
Discussion about this post