Ka KSU Leimow Unit deilang waka KSU Jaiñtia Hills District Unit da lai yachem ko ya ka EE ka PHE Jowai neidaw wym poi de ka umkor ha ka chnong Mowtyrchiah wa Mukhap.
Haka dorkhat wa da e daka seiñ cha ka EE katai ka chnat krehkaam sorkar, ka seiñ da ong ko wa i wym poi ka um ha kitai ki ar tylli ki chnong da ktah sakhiat ko yaki paidbah khamtam wa da poi i tlang, i por wa chitom um bha.
Ka seiñ da pynkynmoo ko leh wa ya itai i wym poi um cha kitai ki chnong, ka seiñ da dep ujor ko nachwa tangwa neiliang ka yung krehkaam ym chimkhia ko iyi iyi leh.
Ka EE hawa yaklam wa kiwa yahkhmat ka seiñ, da ong wa neiliang yong ka yung krehkaam yong ka da dep wow phah ya ka mang poisa cha ka sorkar wei dang yang ki wow yoh yei mynjur yow ye u pynbha pynbiang ya ki thaw pyllang um (Water Tank) yong kitai ki chnong.
Neiliang ka seiñ da kyntu ko ya ka sahep wow chimkhia smat yow pynbiang um ya kitai ki chnong wei ka seiñ hi da rai ko wow booddien ya kani ka kaam khnang wow wanrah yei suk ya ki paidbah wa chong chnong yong kitai ki artylli ki chnong.
