Ka Khasi Students Union Nartiang Circle haka 3 tarik uni u bnai da lai yachem ko ya u SP deilang wa u DC ka West Jaiñtia Hills District hajrong i leh yabor wei leh embor ka Assam ha Mookoiram.
Haka dorkhat wa da phah daka KSU cha u SP wa DC ka West Jaiñtia Hills, ka seiñ da pyntip ko wa ka sorkar Assam da pynemkaam ko ya ki bru yong ka yow tympra yaka thaw sait-that kawa pynkreh lyngba ka Scheme MGNREGA 2018-2019 yong ka Thadlaskein C&RD Block ha ka chnong Mookoiram kawa em hapoh ka Saitsama Outpost.
Ka seiñ da ong ko leh wa na itai i leh embor ka sorkar Assam, ki paidbah ka jylla ha katai ka thaaiñ da dooh ki yei thaw sait-that.
Neiliang ka seiñ da ban joor ko ya u SP wa u DC wow chimkhia ya kani ka kaam khnang wa ki paidbah ka thaaiñ ym maad ki yei eh heiwa neiliang u SP da kular u wow chimkhia ya ini i kaam wei ka seiñ da maham ko leh wa lada ki bor yong ka sorkar Meghalaya ym leh ki iyi iyi leh hajrong ini hadien wa da dep pyntip, lada jia iwon iwon ka seiñ ym em ko yei kitkhlieh.
