Ki dkhot ka Synjuk Ki Rangbah Kur: Ka Bri U Hynñiewtrep kawa man ka seiñ ki kur Khasi da yachem ki wa u Shemborlang Rynjah, Chief Executive Member (CEM) ka Khasi Hills Autonomous District Council (KHADC), yow e yei kyrchaan ya ka Council yow yaleh pyrchah ya ka Public Interest Litigation (PIL) wa da yaleh da ka Syngkhong Rympei Thymmai (SRT) heiwa kani ka PIL toh hajrong i e ya ki Scheduled Tribe (ST) Certificate ha Meghalaya deiwa dawa wow e leh cha kitu kiwa chim dei kur u pa næ u kurim.
Neiliang uwa e ktein ka Synjuk Ki Rangbah Kur, u R. L. Blah da pynsñiaw u yei kyrchaan yong ki kur ya ka KHADC yow lai pyrchah ya kani ka mukotduma ka SRT deiwa ong wa emkaam wow yada ya kani ka riti dustur wa da bood nadooh ki por yongrim ki Khasi kawa da pynemkaam hadooh i rukom hiar pateiñ, i rukom mantre yei thaw i bhaw wa i jied ya ki waheh chnong deiwa kheiñ yurim deiwa man kam ki bru wa chim dei jait ka bei.
Da pynkynmoo u leh yeiwa jia ha u 2014 heiwa ka hukum ka High Court da pynkulmar ko hadien wa da kyntait ko yei bor ki waheh chnong wei da ye wow pynbait yeini du hadien wa lai cha ka Supreme Court yow pynkupbor biang ya ki waheh chnong.
Neiliang u Raphael Warjri kam u dkhot ka synjuk da ong u wa ka SRT da kwah ko wow pynkylla ya ka riti dustur ki Khasi yow man ki kam ki “General Category” ka ri India wei lada leh kamni daw dooh yei hok yada wa da e ha ka riti synchaar neibynta ki jaitbru ri-loom.
Chooh chooh da ong u wa ki riti dustur ka jaitbru ymtoh u chah pyntlot ki du neibynta i sñiaw yong ki kattu katni ngut.
Discussion about this post