Jowai: Ka North East Slow Food Association NESFAS deiwa ya krehlang wa ka Society for Urban and Rural Empowerment (SURE) wa kiwi ki seiñ kreh mon sñiawbha kiwa da kreh lang wow pynkrehkaam yaka thong (Project) ‘No one shall be left behind’. Kani ka Project kawa kyrchaan da ka Rural Electrification Corporation kawa kynthup ya kiwa boon ki phang krehkaam kamjooh ka thong wow sikai wow man kiwa lehkhooid deiwa lai cha ki chnong ki thaw wow e sikai wei da booh 1000 sngi wow leh ya ini.
Kiwa da em bynta hei wow lai e sikai, da lai ki cha ki 28 tylli ki chnong kiwa kani ka Project krehkaam ko deiwa sikai kammon wow man kiwa lehkhooid khamtam wow sait khood yaki kti deiwa pynyoo leh da ki dur ki dar.
Ka Daka Bareh kawi na kiwa embynta wow pynkrehkaam ya kani ka Project ha ki chnong ki thaw da pyntip ko wa da leh ya ini kam chibynta wow yaleh pyrchah yaka khlam COVID-19 deiwa lai cha ka chnong Mukhap, Mynso A wa B, Mulum, Iooksi, Mukhap wa Musiaw kiwa em hapoh ka Laskein Development Block. Ka Ksehrynchang, Nongrimbamthong, Nongkhroh, Tyrchang wa Mookjat kiwa haap hapoh ka Thadlaskein Development Block. Ka Mupyut, Skhenpyrsit, Nongtalang Mission, Amkhloo, Ammutong, Thangbuli, Umsalang, Nongbareh, Pynthor Langtein, Muphlang, Mustem, Samanong wa Moosakhia hapoh Amlarem Civil Sub-Division wa ka Cham Cham ha East Jaiñtia Hills.
