Ka Federation of Khasi Jaiñtia & Garo People (FKJGP) haka khubor wa da phah lyngba u Sports Secretary ka seiñ u khynroo Nidalam Rymbai da ong wa ka FKJGP Thadlaskeiñ Circle ha kani ka tayaw da lai e yarap ki ya uwi u tymmen wa em haka chnong Namdong-B.
Uni u waheh da yoh u yei kjut da ki boon boon snem wei da maad u yei eh wa boon neidaw wym ye de u lai khih lai kreh hadooh kini ki sngi. Kamtæ neiliang ki dkhot yong ka FKJGP Thadlaskeiñ Circle da lai e yarap ki ya oo da u khoo.
Heijooh i por neiliang yong ka FKJGP Nongkhroh Unit da lai e yarap ki da u khoo ya uwi u khynnah khonswet haka chnong Nongkhroh. Kamtæ neiliang ka seiñ da kyntu ko leh yaki paralok para jor kiwa em ka laad wow sñiawbha ki u noh kyllooid mynsien cha kiwa dooh wa duk ki khonswet khon rangli khamtam ha kam uni u snem wa ka jylla yong i da maad ko ya ini i eh heiyatoh wa uni u khñiang COVID-19 uwa da pyndooh thiah pyndooh dem ya ka ri wa yaka jaitbru ka yong i.
