Khliehriat: Ka Meghalaya People United Front (MPUF) Khliehriat Circle, ynne ka sngi hei yahkhmat u Kyrshan Blah uwa man u President ka Khliehriat Circle hei emlang u Juny Phawa uwa man leh u President ka San Shnong Circle wa u Onickson Dkhar wa man leh u dkhot ka seiñ wa kiwi kiwi de ki dkhot yong ka da lai e yarap ki da u khoo, ki kymmor wa ki sula ya uwi u khynnah uwa duna hei bor khmat uwa tip pyrtuid kam u Estartwell Dkhar uwa em 11 snem i rta uwa chong wa sah haka chnong Khliehriat East, dong Sait Pathi wei utai u khynnah leh ma u uwa sah khonswet wei da sumaar ya oo nadooh dang khian u da ka beipun yong oo.
Ha chwa wow e ya kitai ki tiar, da pynman leh i yalang wa khian hei emlang kiwa ha yung ha sem yong utai u khynnah.
Hadien ka yalang, u Kyrshan Blah hawa klam u, da booh u i kyntu kyrpaad yaki para seiñ krehmon sñiawbha wa ki leh wow sñiawbha ki wow e yarap ya uni u khynnah katwa ye i bor yong ki, kamjooh leh da kyntu u yaka chnat sorkar wa toh u pait neibynta kitu wa duna hei doh i pran wow sñiawbha ki wow yarap ya oo.
Kiwa ha yung ha sem yong u Estartwell Dkhar hawa klam ki da pynsñiaw ki yei sñiawngooh wa khroo neibynta ka seiñ wada smat ko wow pait ya ki bru wa chem yei eh yei chitom ha iwon iwon i bynta kamwa da yoo haki khubor, khatam ya utai u khon yong ki, da khana wa uni u khon ki heipor wa dang khian u ye hi u wow pait tangwa neidaw wa joor i kjut u heipor wa dang khian u, manda dap u le snem syndet syndet ym chynna de u wow pait wei i kjut u leh wiar i tangwa ki khmat won ym chynna de ki.
Kamtæ da kitbok kitrwiang kiwa hayung ya ka seiñ deilang wa i duwai neibynta yong ki wow nang ye chooh chooh ki wow leh yaki kaam wa bha haka imlang sahlang deiwa yah luti u Blai Tre Kynrad ya ki ha i lai luti yong ki kam ka seiñ krehmon sñiawbha.
