Ka Sur U Paidbah East Jaiñtia Hills District (KSUP-EJH), kawa man ka synjuk kawa da seiñ wow pait ya i miat i bha ka East Jaiñtia Hills da lai e yarap ko ya ka thaw ri khynnah, ka 7-Thyndai Child Care Institute Cum-Counselling Centre (Orphanage Home) kawa em ha Tuber Kmaichnong, East Jaiñtia Hills District.
Ya ini i yarap kynthup i ya ki marbaam ya kiwa da ekti ha ka Seiñ Manbei Seiñraij Tuber kawa pynlai ya kani ka thaw heiwa ya ka KSUP da yahkhmat da u Dr. Ryngkat Phawa uwa man u Chairman ka KSUP, u Streamly N Suchen uwa man kam u Assistant Secretary General wa ki dkhot wa kynthup ya u Justice Lyngdoh, Livingstone Phawa, Jespar Bareh, Everlast Nongtdu, ka Crescent Tlang, ka Burom Tlang wa u Harvis Phawa.
Ha kani ka sngi da yoh ya i kyntien ngoohblai na u Jiedlang Sana uwa man u Waheh Chnong ka Tuber Kmaichnong, i klam na ka Melis Dkhar ka Secretary kani ka thaw kawa da khana leh ya i parom kani ka thaw ri khynnah.
Da yoh leh i klam na u Justice Lyngdoh wa na u Harvis Phawa kiwa da e mynsien ya kiwa pynlai kani ka thaw wa ym toh u dooh mynsien ki hanla chem ki chiboon i eh i khoo neibhah kani ka kaam toh kawa emburom wow yarap para bru khamtam ki khynnah emkaam ki yei sumaar wa paka neibynta ka mynried yong ki.
Da kitbok kitrwiang ki leh ya ka Seiñ Manbei Seiñraij Tuber wow pynlai chaphrang ya kani ka thaw.
Neiliang ka Seiñraij da e khublei ko leh ua ka Sur U Paidbah East Jaiñtia Hills wei da kitbok ki leh ya ki dkhot yong ka wow ye ki u yarap ya kiwi tawon neini chaphrang.
Ki tiar kiwa da e ha kani ka sngi kynthup ki ya kawi ka almari, 5 tylli ki kchu spon, kharai, 18 tylli ki pliang Steel, 2 tylli ki dabor, 100 kilo u khoo Arham, 52 kilo u syllah, 10 kilo u dai wa ka pylleiñ 10 synduk.
