Ka Synjuk Waheh Chnong Jowai deiwa yoh bor katkam ka hukum u Deputy Commissioner, West Jaiñtia Hills District, kawa man chibynta wow lehkmen ya ka Republic Day 2023, wow lai li e sñiawbha ya iwon iwon i e cha ka World Mission Children’s Home (Girls) Nartiang.
Neiliang ka Synjuk waroh kawi da li saam ko yei baam deilang wa mar kawi kymmor cha ki 14 ngut ki khynnah kynthai wa em ha ka World Mission Children’s Home (Girls), Nartiang. Ha chwa wow saam, da em ka yalang tbian wa pynlai da u President ka Synjuk, u Alan Niangti, uwa da pdiang burom ya waroh kiwa yalai lang kamjooh ya kiwa ri wa sumaar ya kini ki khynnah.
Da yoh ya i klam tbian na ka Sonia Pala kawa man ka Superintendent yong kani ka thaw heiwa da khana ko ya ka parom yong kani ka thaw ya kawa da chna nadooh u snem 2018 khlem i yoh yarap na ka sorkar.
U General Secretary ka Synjuk, u Riquoma Rq. Laloo hei klam yong oo, da khana u ya i daw wa lehkmen ya ka Republic Day weiwa da e khublei haroh u ya ka bor District West Jaiñtia Hills District kawa da chah ya ka Synjuk wow leh ya ini i kaam, iwa man i kaam wa khroo tam wow yoh u yarap ya ki khynnah kam ha kini ki thaw. Da ong u ya ki khynnah wa i naam manphi ki khonswet, tang wym em u sah khonswet phi, em hi kini kiwa ri wa sumaar ya phi, wow man kam ki bei ki pa yong phi, heiwa waroh i leh man hi i ki bei ki pa yong phi.
“Em i itæ i sñiaw wow yarap ymtoh du ha kini ki por, wa ha kiwi tawon ki por wa emkaam phi,” da ong u Riquoma.
Da sneiñ u leh ya ki khynnah wow man ki kiwa tip akor tip salon, nadooh na i thaw sah hadooh ha lait næ heiwon iwon i thaw wa lai ki yoh ki u man kiwa yoh yaroh ha ki waboon walang.
Da ong u wa lada man phi kamtæ, i kyrkhu na u Blai daw yoh phi ki dei wympoi pyrkhat. Da kyntu u ya kiwa ri wa sumaar ya ki wa ymhoi u man ki kiwa pait chiliang ya kiwon kiwon ki khynnah tangwa emkaam u sumaar ya ki salonsar.
Da yoh ya ki kyntien Ngoohblai na u James Pohsngap, Assistant Waheh Chnong Khimusniang. Da saam ya ki tiar cha ki khynnah da ki waheh chnong wa ye u yalai lang chirup ya kiwa ri ya kini ki khynnah.
Da pynkut u President deiwa e khublei ya waroh ki waheh chnong kamjooh leh ya waroh ki dkhot ka Synjuk Waheh Chnong Jowai yeiwa da yoh laad u leh ya ini i kaam wa khroo.
