Ka Riders Tribe Rymbai (RTR) da panman ko ya ka Charity Ride namo i lai e yarap sñiawbha kawa nyngkong dooh yong ka seiñ ha ka chnong Deinsatlang, East Jaiñtia Hills heiwa da em ka yalang wa pynlai da u waheh chnong warim u Piwel Phniaw.
Ha kani ka sngi da emlang leh u waheh chnong ka chnong u Joplin Pohthmi ryngkat wa u President ka seiñ u Marsanky Sympli, u Secretary u Leonard Dkhar wa ki dkhot ka seiñ.
Ha kani ka yalang da yoh ya ki kyntien lamphang hajrong i thmu ka seiñ na u Plonsis Sympli uwa man u Asst. Secretary yong ka seiñ, da yoh leh i pynche ya kiwa chong chnong hajrong ka kjut HIV /AIDS wei kammon u yada na ka ya iwa da batai da u dkhot ka seiñ, u Airforce Ksih.
Ha kani ka yalang ka RTR da saam ko ya ki kymmor mar ar tylli cha kiwa yoh myntoi kiwa em kamwa 15 tylli ki manyung na ka chnong.
Da em leh i pynchongchit ya kani ka sngi da ki chaad na ka dhab chaad na Rymbai ka “Rymbai Dancing Crew” wa i rwai na u Rowink Dkhar wa u Eglancis Dkhar kiwa man leh ki dkhot ka dhab tem wa pawnaam ka jylla, ka ‘Dewdrops’.
Discussion about this post