U Director General of Police (DGP) ka jylla, u Dr. Lajja Ram Bishnoi ynne i miet da lai u wow pait ya ki kattu katni ki bynta yong ka sor Shillong wei da yaklam u leh wa ki kattu katni ngut ki khynroo ha Jaiaw, wei kamjooh da yachem u ya ka tre dukan wa jia i chah dat ki ar ngut ki khynroo puræ ka jylla Kerala.
Ha kani ka miet u DGP deilang wa ki heh pulit ka East Khasi Hills District da lai u dei kjat cha ki bynta yong ka Khyndailad, Umsohsun, Motphran, Mawkhar wa Jaiaw wei hawa poi ha Jaiaw da lai u leh wow klam wa ki kattu katni ki khynroo, hadien ini da lai u leh wow takit na ka tre dukan hajrong i chah dat ki 2 ngut ha ka 24 tarik uni u bnai.
Ini i lai pait da u khliehdooh ki pulit ka jylla ya katai ka thaaiñ toh wow pynyajan yei yatoh wa ki pulit wa ki paidbah wei kamjooh leh wow wanrah yei chngaaiñ wei wow tip yei eh kiwa chong chnong khamtam wow tip leh yei long i man yong ka nongbah Shillong.
Hawa klam wa ki laad pathai khubor, u DGP Bishnoi da ong u wa i thmu yong ini i lai yong ki toh wow sñiawthooh yeiwa emkaam wa i eh yong ki paidbah wa chong chnong wei wow pait leh ya i rukom pynbiang ya ki bor pulit wei da ong u wa lada emkaam, ka chnat pulit daw pynkhlan chooh chooh ya ki bor pulit wa lai uiñ sonteri.
Da ong u wa ka chnat pulit daw yachem kyrpang ko leh wa kiwa yahkhmat chnong ha ka tayaw wow wan yow sñiawthooh yeiwa emkaam wei wow paan leh yei ya krehlang neibynta wow kdoh u khoom ya ki kaam wa sih.
Uni u khliehdooh ki pulit da phah u ya ka khubor cha ki khynroo wow pynlai yei bor wow puræ puthi, wow kiar na ki kaam wa man pyrchah aiñ, wei lada yachem ya iwon iwon i eh wow man ki kiwa sñiaw laitlooid wow lai pynsñiaw cha ki bor wa toh u pait kamjooh cha ki pulit.
Da kyntu u ya ki khynroo wow kiar wei wow rai u dam u leh ya ki kaam pyrchah aiñ, kam hei khayi drug, khayi bru, dawa poisa, u maham lane dat ya kiwi khlem iwon iwon i daw, neibhah wa kam kini ki kaam daw pynbood naam ko ya ka jylla cha kiwi won ki thaw. Da ong wa i sakhiat wa ya kam kini ki kaam ym em kiwon kiwon leh wa sñiawsuk, nadooh ki waheh chnong, kiwa chong chnong pyrchah ki neibhah wym man i kaam wa bha ya ka jylla.
U Dr. Bishnoi da ong u wa kam ini i lai pait daw pteiñ ha ki sngi wow wan yow rap sñiawthooh chooh chooh yei long i man i thaw.
