I yakhih wa khlem booh por ka seiñ Jaiñtia Hills Truck Owners Association (JHTOA) ynne ka sngi da poi i cha ka sngi wa le heiwa ya kani ka yakhih da sdang nadooh ka 6 tarik uni u bnai.
Kam wow pynkynmoo heini, ini i yakhih toh neidaw wym mano ki karkhana pynmih khyndaw-bilat ya i dawa yong ka seiñ wow su ya i dor bai kit katkam wa da booh ka sorkar iwa T. 7 chi Metric Ton chi Kilometer wei wow wanrah biang ya ki kudam yong ki karkhana chapoh jylla Meghalaya na Assam kamwa jooh man nachwa.
Ya ini i yakhih da pynman ha Takhniang, Tuber East Jaiñtia Hills hajan ka yung krehkaam ka seiñ heiwa ki dkhot ka seiñ da ksoh wei da pynuiñ lut ki ya ki Truck wa wan wei kiwa lai cha ki karkhana.
Neiliang u Nehemayah Tyngkan da ong u wa hadooh ynne ka sngi ympu yoh jubab na ki karkhana wei ka seiñ leh ym sangeh ko hei yakhih hadooh wa yoh ko yei jop wei da kyntu u ya ki paidbah wow yaichah wei wow kyrchaan ki ya ka seiñ ha kani ka kynti.
Chooh chooh da ong u wa ki karkhana heipor wa sdang ki u krehkaam chapoh Ri-loom Jaiñtia da kular ki wow e khih e kreh wei wow yarap ya ki tre chnong tre jylla tangwa katni ha kini ki karkhana da kreh ki mar dei kangtleiñ.
Heiyatoh wa ini i yakhih ka JHTOA da kyrchaan leh da ki kattu katni ki seiñbhalang kam ka JSU, ka JSM, MPUF, EJNC wa kiwi kiwi.
