Jowai: Hadien wada bna wa mih i kulmar ha pyrdi ki manbei ha Civil Hospital ha kani ka taiaw hadooh wa poi cha i iachoh iadat, ki le tylli ki seiñ wa kynthup ia ka JYF, JSU wa ka HNPF da lai iachem ki wa ka Dr. A.E. Paswet Medical Superintendent ka Civil Hospital yow ioh i pynche halor i daw wa jia ini i kulmar. Ka doktor da pynche ko wa ia kani ka scheme e poisa ka sorkar iaki manbei toh du ia kitu kiwa iohkhon ha kani ka civil hospital wei, u e leh du nei wynta ki arngut ki khonboo, mut du ia iwa kha nyngkong wa iwa kha wa ar.
Kani ka skhim toh kawa da pynbna ka sorkar da slem kawa pyllait poisa ka sorkar dang how ni u snem 2015. Tangwa u pynkrehkam toh nadooh ka chi tarik u naitung (April) 2011. I pyrtuid ka skhim toh Mother Maternty Benifit Scheme (MMBS). Neiliang ka Dr. Paswet kyrpad ko ia kitu ki manbei wymtoh u tein sar ki iadooh. Kani ka skhim ka wow neh bon snem kamte ham wan iaknieh ieinlain nei syniaw.
Katkam wa man katni pyllait poisa ki 50 ngut bru donhi chisngi, na kani ka skhim ki manbei u ioh ki 4000 iwi i khon. Ki dkhot kini ki seiñ da e jingmut ki u pynku ia kani cha ka 150 ngut chisngi, ka doktor da jubab ko wa ym em dap bru wakreh ka hospital u e hadooh 150 ngut chisngi.
Neiliang ki seinbhalang dalai li kyrpad ki ia u DMHO yow phah nongkreh ha Civil ki wow iarap hei iatoh wa i sam ia kani ka skhim. Katwa neiliang u DMHO Dr.Tongper da ong u wow pyrchang u, u thoohlad katwa cha hi bor wow iarap iaka civil Hospital.
Da ioh yutip leh wa chimpoor u pynkhreh ia kani ka skhim yow pyntikna wa ki bru wa wan thooh ia ka toh ne ym toh kiwa da kha khon hapoh ka Civil Hospital.
Discussion about this post