Saitsama: Ynne ka sngi da lai jurib ia ka khloo deinkseh Saitsama hadein wa u Chief Executive Member ka Jaintia Hills Autonomous District Council (JHADC) u ma Thombor Shiwat da mynjur u hapoh ka Ïung Dorbar Lyiur ka JHADC kawa man hakni ka 4 tarik uni u bnai.
17 ngut ki MDC ka JHADC wa uwi u opposition u ma Marki Mulieh da lai li hiar ki cha Siatsama iow pynsakhiat ia ki kynnoh ki tre chnong wa da ah dusmon ah pathar ia kini ki deinkseh cha wa palat na kani ka khloo kawa em ha chnong Saitsama.
U CEM hadein wa dep li peit u cha wah cha nein kani ka khloo da ong u wa hei chem iong Oo kini ki dein wa da dep pam toh kiwa da biang por wei da ah ia ki kam wa da buh da kdaw ka JHADC. Da ong u leh lada chem won wa u kontraktor leh palat u i wa da booh da thoh ka JHADC daw pynchitom ia Oo.
U Marki Mulieh ong u wa ha i chem yong Oo ynne ka sngi da yoo u boon ki kyndon ka ain kam Ka Forest Act wada tyngkhein ha ini i pom ia ki dein hawa peit ia ki heh kini ki dein. Ong u leh daw rah biang iakani ka kaam ha Ïung Dorbar ka JHADC sa chisein.
Ki tre chnong ha kani ka sngi ong ki wa ym em pyntip wei ym em khut lang ka JHADC ia ki ha kani ka wa lai jurip ki.
Kamwa pynkynmoo wa kani ka khloo em ko ha Mookoiram hajan Saitsama wei wa da dep dai lilam ka JHADC ka cha u kontraktor ha ka dor wa 31 lak tam. Hadein wa mih i ujor naki tre chnong ia u kontraktor wa da pam u naphang ia ki dein khlem bood ia ki kyndon wada buh ka JHADC; da khang ia u kontrak u kit u ia kini ki dein. Ki tre chnong kynnoh ki wa da dep pam da pyllat 6 hajar tylli, katwa u CFO ong u wa da ep pam duh 4 hajar tam wei dang emkam sa chi hajar tylli iow poi kam wa dep ia soi wa u kontraktor.
Ia kini ki deinkseh da thung nadu ki snem 1980-81 iow man ki kam ki pood wa ka jylla Assam dei wa mynjur lang wa ki tre chnong. Da rai ka JHADC u dai lilam ia kani ka khloo hadein wa da ioh bun ki ujor na ki ranger wa em kiwa tuh dein man ka por 5 tre 6 tre chi sngi na kani ka thaw. Ia kani ka khloo da tip iaka kam ka Khlooiapsaiong.
Discussion about this post