Ka HYC Narpuh Circle hapoh i yahkhmat u General Secretary u A. Lyngdoh ynnin ka 15 tarik da lai hiar syndet ko cha ka karkhana Black Tiger Cement yow khang yaka Gate hajrong i slem ko wow pynkrehkaam yei dawa ka seiñ wow pynkrehkaam yei bai mylla sngi katkam ki dor wa da booh da ka sorkar namo ka Minimum Wage.
Neiliang kani ka karkhana da dep ko wow paan por 20 sngi tangwa kani ka karkhana ym em leh ko ya ini kamwa da kular ko.
Ka seiñ da ong ko leh wa ya ka wi ka kynthai kawa da kular wow e kreh hapoh kani ka karkhana tangwa ya ini leh ym em leh wei hajrong kini ki daw da lai wow pynyoo da i kaam.
U Publicity Secretary ka seiñ u Pyndap Syiemlieh da pyntip u wa ha chwa wow khang yaka Gate katai ka karkhana, da beh ya waroh ki wakreh wei da khang leh waroh ki thaw krehkaam yong ka.
Hadien soo kynta da wan ki heh katai ka karkhana wow yaklam waka seiñ kiwa da ong wa smat ki kohngooh yeiwa dawa ka seiñ deiwa e leh da iwa dei thoh cha ka seiñ wei da e kreh leh syndon yaka kynthai kawa na kani ka thaaiñ hi i.
Kamtæ hadien ini da chah biang wow wai ya katai ka karkhana heiwa ka seiñ da ong ko wa ki karkhana pynmih khyndaw-bilat ym toh u lai lait ki yaki kyndon wa da booh da ka sorkar næ wow leh katwa ngait, u yooh beiñ yei hok ki paidbah wa ya kiwa dooh wa duk, næ ya ki wakreh yong ka hi.
Ka seiñ da maham ko leh wa lada ka karkhana ym pynkreh ko yaka Minimum Wage daw leh da iwa eh ya katai ka Black Tiger Cement deiwa kyntu leh ya ki paradoh para snam wa hawa yoh kreh ha kiwon kiwon ki Company wow sñiawbha wow kreh hok, wow minot thop khnang wow yoh yei myntoi hawa kreh namo ka Work Experience yow ye u saiñ dur yaka mynried wa tyrchaiñ hadooh wa manda seiñ kreh phi da i yong phi hi, pynkut ka kyrwoh na u Publicity Secretary u P. Syiemlieh.
