Ka seiñ Jaiñtia Students’ Movement (JSM) hadien wa khang ko ya ka Toll Plaza wa em ha Lumshnong ha 26 tarik uni u bnai neidaw wym pynchna ka NHAI ya u sarok NH06 uwa da sih cha palat pood hadooh wym yahaap de wow ong toh u National Highway, uwa da ktah bha ya ki paidbah wa lai wa wan ha ki bynta ka East Jaiñtia Hills.
Chooh chooh wa uni u sarok toh uwa pynyabi ya ki paidbah wa lai cha kiwi ki jylla kam ka Assam, Manipur, Mizoram wa Tripura da man ko i yoosarom wa khroo ya ka District, da ong ka seiñ.
Pyn hei miet ka 26 tarik ka seiñ da chem ko wa kiwa pynlai ya kani ka Toll Plaza ym em kheiñ snep ki yeini i khang ka seiñ wei da sdang biang ki wow khrong dan hanla da khang ka seiñ kat wym pu dep u pynchna ya u sarok.
Kamtæ ynnin ka 27 tarik da lai hiar biang ka seiñ cha kani ka Toll Plaza yow khang biang sa chisien ya kani ka Toll Plaza deiwa dawa biang wow pynchna smat ya uni u sarok wei kat wym pu pynbait u pynchna ya uni u sarok, neiliang ka seiñ ym e laad ko wow khrong dan kani ka Toll Plaza.
