Ynne ka sngi da man ko ka wow sahkynmoo sa chisien ya ki spah ngut ki khynroo chynrang wa kynthai deilang wa ki khynnah ka chnong Dkhiah West wa kamjooh ya kiwi tawon kam na Dkhiah East wa Khliehriat kiwa da chimbynta hei kaap kjat wa pynman da ka Trekking & Adventure Enthusiasts, Dkhiah West.
Kani ka kaap kjat da pynman ya ka man-u-snem nadooh u 2017 wei ha kani ka kynti chwa wow sdang yei kaap kjat da yoh yei klam maitphang na u Dr. R. Phawa wei i thmu ini i lai kaap kjat toh wa kam kiwa chong wasa emkaam i u maya u sumaar sukhær ya ka bei rymaw wa kamjooh ya ki warim wajah wei lym yohsa wym hoi u mylliñ i ki.
Ya kani ka kaap kjat da pynman hajrong ka phang wa ong “Pynkhai im ya ki warim” namo “Revive the Old Golden Era” heiwa da yoh yei klam sneiñ kyntu wa i duwai na u Tbn. Lovely Dkhar, Headmaster ka Dkhiah Presbyterian Secondary School.
Ya kani ka lai kjat da sdang nadooh yung Club deiwa lai lyngba ka Moothathlen Wah Mynkseh, ka Nongkhlieh, ka Iawpynsiñ Rymbai deiwa bood ya ki luti wa pynemkaam da ki warim wajah wa jooh lai yaw ki nong Suchen dang tyndæ wei da chem wa ki moo pynyieñ, ki luti syngkieñ wa na warim dang neh dang sah ki katni leh.
Da ku Ieh ya u riat ka chnong Deiñshalalu, da kaap ter-ter tymbood ki luti rim hadooh wa poi hajan ka wah Umkyrdeiñ. Ha ini i thaw da psiah cheiliang tidiang yong ka chnong Iapmala na ka wah Khahare ter-ter hadooh wa poi Suchen Chnong Rim kawa man ka chnong wa da rim bha ha kani ka thaaiñ wei heini leh da chem wa boon ki dak ki chin yong u warim hadooh katni dang neh i.
Hadien ini da dong cha Tyrnein Loom Suchen weida da pdiang sñiawbha ya kini kiwa lai kjat da ki waheh, kynthai chynrang wa khynnah yong ka chnong wei da yoh yei khana yei parom hiar pateiñ chaphang ka chnong Suchen da u Emmon Sumer.
Da lehkmen ya kani ka sngi deiwa ya baam ja sñiawbha ha madan Tyrnein Loom chirup wa ki tre chnong heitai.
Kam i dak sñiawburom sñiawngooh ya ki waheh, da saam da ka khusnaam (Award) wa kiwi kiwi de i e sñiawbha cha ki le ngut ki waheh, kitæ u Wh. Jiren swer, u Wh. Muni Swer wa u Wh. Kidras Sympli wei kini toh kiwa yahkhmat wow prat wow yah luti ya ki khynroo wot hapyrdi i rta wa da heh.
Hadien wa kut kani ka lai kjat, da pynman leh ya ka Free Medical Camp ha Suchen Tyrnein Loom da u Dr. R. Phawa wa ki bru ka IONG I MEDICINE.
Ini waroh da pynrngum ko sakhiat i ya u dohnood mynsien yong waroh kiwa da yoh wow booddien ya ki luti lai kjat lai yaaw ki nong Suchen heipor warim wym pu em sarok.
