Ka Jaiñtia National Council Khliehriat Circle ha ka 19 tarik uni u bnai hapoh i yahkhmat u Shanborlang Bamon, President ka Circle, u Symboh Sumer, General Secretary ka Circle hei synraanlang u Wanshwa Suting, General Secretary ka JNC Central Executive Committee da lai yachem ki markhmat wa u R. Nongtdu, Sub-Divisional Officer, PHE Electrical, Khliehriat Division neibynta wow kylli hajrong ki daw wa slem ka umkor u poi cha ki chnong waphær waphær kiwa em hapoh ka thaaiñ Khliehriat.
Neiliang u SDO da khana u wa ki 12 tylli ki chnong wa em hapoh ka thaaiñ Khliehriat ym em haap ki hapoh ka Jal Jeevan Mission Scheme tangwa hapoh ka Greater Rymbai Water Supply.
Pyntip haroh u wa ya kani ka Project hei yong sakhiat da sdang nadooh u snem 2007 tangwa neidaw wa da sahteiñ ko ym ye de wow pyndep namo wo pynpoi um cha ki 12 tylli ki chnong.
Kamtæ hadien wa da pynthymme namo Revise ya ka, da Sanction won deiwi ha u snem 2019-2020 ya kani ka kaam wei da yoh u sdang biang katni, wei ki chnong wow yoh um na kani kynthup ya ka Deinsatlang, Umsatai, Rymbai, Deinchynrum, waroh ka Ladrymbai, Khliehriat East, Khliehriat West, Dkhiah East wa Dkhiah West.
Kamwa man kattæ i kreh boon toh kiwa dadep nadooh ki Top pynlang um, ki Pipe katwa iwa dang sah toh wow pyrchang ya ki Pipe um yow pyntikna wym em de lait ka um charood.
Heiyatoh wa ka thaw taan um leh dadep wan Test da ka Pollution Board deilang ka yung krehkaam ka PHE katkam ka hukum yong ka NGT wei da chem wa wan ka um wa hoi u dih.
Kamtæ neiliang ka seiñ da kyntu joor ko ya ka yung krehkaam u SDO wow pynsmat ya kani ka kaam khnang wa ki 12 chnong u yoh um noh ki khamtam ha ka chnong Khliehriat kawa man leh ka Headquarter yong ka District kawa em boon ki bru wa wan na kylleiñ ki chnong nadooh wow puræ puthi, kiwa kreh kaam sorkar, kiwa kreh mylla sngi, kiwa chong wai, kiwa dai dukan wa kiwi.
U SDO leh kular u hakhmat yong ki wow yaleh pynsmat katwa ye wa lah hapoh uni u snem 2025.
Discussion about this post