Ka seiñ FKJGP-Khliehriat Circle ynne da li kynreh Trading License wa Labour License ha ki thaaiñ Ladrymbai wa Dkhiah West hadien wa neipor cheipor da thoh cha ka JHADC wow leh ko da ka yeini ya ki baar jylla wa em hapoh East Jaiñtia kam i kaam ram yong ka.
Ha ini i lai kynreh da chem wa kiwa boon ki baar jylla toh kiwa em Trading License tangwa rap boon ki dukan won ym em Labour License wei hawa yatoh wa kiwa dai tim leh kiwa boon toh kiwa em License.
Ya kitu won ki dukan ki wym biang ki kot ki sla, ka seiñ da e por ko ar tayaaw wow pynbiang wei daw wan kynreh biang, wei lada ym leh ki yeini daw leh ka seiñ ya iwa emkaam.
Ha iwi won i liang ka seiñ da pynsñiaw ko yei sñiawsih wa e roi ka JHADC ya ki License khlem da pyrkhat ya ki tre jylla wei hei yoo da yoo lakam wa da e License bait cha kiwon kiwon khlem da tip lada uwa na Pakistan næ na Bangladesh wei ini rukom leh ye u ong wa da tynkgkheiñ yaki kyndon ka Council hi neibhah katkam ka aiñ hapoh ka kyndon Section 10(2)(iv) yong ka United Khasi Jaiñtia Hills District (Trading by Non-Tribals) Regulations,1954 da khang laad wow e Trading License ya ki baar jylla lada em ki tre chnong kiwa leh yei jooh i kaam katkam wa ong katai ka aiñ.
Ka seiñ da ong ko wa ka Council da e License ko cha kiwa dai that, dai juti, dai kwai dong, ki dukan ah sñiooh kiwa man kiwa ye u leh da ki tre jylla wei lada kamni kammon u yada ka Council ya ki tre chnong iwa da kylla pathan kamwa yada ya ki baar jylla deiwa e Trading License.
Kamtæ da kyntu ya ka JHADC wow sangeh noh yei e Trading License cha ki baar jylla khnang wow im ki paradoh para snaam.
Discussion about this post