Ka Kiang Nangbah Government College Students’ Union hapoh i yahkhmat u President, u Precious Star Sten, ynne i step da lai e kyrchan ki ya u Ardent Basaiawmoit uwa da chah thngan hajrong ka mat wow dawa pynbait biang yaka Reservation Policy næ ka bhah thung kreh hapoh ka jylla.
Neilang u Precious Star Sten da ong u wa ini i wan yong ki wymtoh wa kyrchaan ki yaka Party VPP, tangwa yaka mat yakhih u Ardent Basaiawmoit neibhah wa ki leh sñiawthooh ki yei chahktah kam kiwa daw thooh khih thooh kreh hadien lym pynbait yaka Reservation Policy.
Kamtæ kyntu ki leh ya waroh 7 ngut ki MLA napoh ka Ri-loom Jaiñtia wow sñiawbha ki u chimkhia ya kani ka bynta deiwa pynemkaam hok yei bor wa ki Constituency waphær waphær da e ki i chaniah ha ki yow pait ki yei eh i khoo najrong wow leh yeiwa bha tam.
“Kam ki khon khynroo khyllood wa pure ha Kiang Nangbah Government College em i ka bynta u pynchong ya phi haka chuki phi kam kitæ kiwa mihkhmat yow chna aiñ yow pait phi yei eh i khoo yong i ki khon khynroo khyllood, wym toh u man hi-eh phi kiwa chah pynka-i ha kiwon kiwon,” ong u Precious Star Sten.
