Jowai: Ka Khasi Student Union Nongthymmai Circle ynne ka sngi da lai yachem ko ya ki heh yong ka Company Power Grid hajrong i ujor kiwa kreh kani ka Company wa da chah ah tulop kiwa kreh Contract Basis.
Katkam ka ujor wa da yoh na kiwa kreh kani ka Company da ong wa ini i chah ah tulop chi sngi toh neidaw wa kiwa kreh kani ka Comapany ym em wan kreh ki ha ka sngi khut khang chnong ka NESO kawa pynman ha ka 08-01-19 ha waroh ka thaaiñ mihsngi.
Neiliang ka Khasi Students Union Nongthymmai Circle hapoh i yahkhmat u Richard Mawkhiew General Secretary ka seiñ, da lai hiar ki cha ka yung krehkaam ka Power Grid kawa em ha Nongrah, Shillong wow dawa na kani ka Company wow su noh smat ya ka bai nong kini kiwa kreh kiwa da chah ah tulop haka khang chnong.
Ha iwa nyngkong ka tai ka Company ka da pynneh ko wa ym su ya ya ka wa da chah ah, tangwa hadien ka yatai nia kawa slem wei da pynneh kiwa yahkhmat ka seiñ hawa khaddooh kani ka Company da kohngooh ko wow su ya ka bai nong ha u bnai wow wan kiwa krehkaam kiwa chah ah tulop kiwa da em kamwa 40 ngut.
“Kammon waka Power Grid u ah tulop ko ha ki sngi wa dam kreh i hawa em ka khang chnong, ym toh na i daw samen kiwa kreh wei lada jia iwon iwon ya i yi kiyi wow kitkhlieh,” da kylli kiwa kreh. Neiliang won uwa yahkhmat ka seiñ u Richard Mawkhiew da ong u wa ini i ah tulop toh u pait bniah ya ini i leh kani ka Company ya ki tre ri kamjooh kiwi ki yung krehkaam ki bru samen kamjoooh yong ka sorkar ya ki tre ri.
Discussion about this post