Ka Irene Dkhar kawa da ksoh yei naam Miss Tourism India, u mihkhmat ko ya ka ri India ha ka lympung Miss Tourism World 2025 Global Finals, kawa daw pynman ha ka 10 tarik uni u bnai January ha Guangdong, China.
Ka Irene da mih ko na Delhi nadooh 27 tarik u Kmaichonglad (Dec), 2024 wei dadep ko wow emlang wa kiwi kiwa yakhun wow mihkhmat na 60 tylli ki ri wa kynthup na United States, France, Brazil, Venezuela ryngkat ki dkhot yong ka Belt and Road Initiative deilang ka Shanghai Cooperation Organization.
Ka naam Miss Tourism World toh man ko kawi ka laad wow pyntipmit wei wow pynpawnaam ya ki kaam uiñke suwari kamjooh ka dustur riti yong ka ri kawa pynman ya kani ka lympung kamjooh leh ya ki ri wa lai chimbynta.
Kani ka lympung da yoh ko leh yei kyrchaan na u Ahmed Mustafa Fahmi, uwa man u Ambassador ka Arab League Ambassador cha China; u Sinisha Belyan, Ambassador ka Bosnia & Herzegovina cha China; wa u Ivan Chiulu, Ambassador ka Zambia cha China.
I lai luti yong ka Irene Dkhar wow poi cha kani ka lympung wa heh toh deiwa jop chwa yei naam kam ka Miss Tourism India 2024, wei da jop ko leh ya kiwi kiwa boon ki yakob miat kynthai wa kynthup ya ka pansnget Miss Meghalaya 2022, Miss Northeast 2022 wei da mihkhmat ko leh kam ka Femina Miss India Meghalaya 2023 wa ha ka Miss Grand India Meghalaya 2024.
Neiliang ka Miss Meghalaya Organization da pyn-eh-daw ko ya ka Irene deiwa pynsñiaw leh yei kyrmen wow wanrah ya ka pansnget i jop cha ri India.
Discussion about this post