Ka JNC Western Zone hadien wa da sñiaw ko yei ood yei naam kiwa chong chnong yong ka chnong Madan Pohkseh neidaw wym pu em u yoh bordiñ ki la kattu katni tylli ki snem, da lai mih ki dkhot ka seiñ cha ka chnat MePDCL Jowai Distribution Sub-Division wow lai yachem wa u sahep L. Syngkon, Executive Engineer, deiwa e leh chirup dei thoh neibynta wow dawa pynyoh bordiñ ya kani ka chnong.
Ka chnong Madan Pohkseh toh ka chnong wa haap ha ka Laskein Block, West Jaiñtia Hills District wei man ko leh ka chnong kawa da rim bha, wei kam ha kani ka juk wa katni u chong u im khlem bordiñ da man ko i doohnong wa khroo ha waroh i liang khamtam hei puræ puthi ki pli ki khynnah skur.
Neiliang u Executive Engineer hei yaklam waka seiñ da kular u wow pynyoh bordiñ ha kani ka chnong wei da ong u leh wow pyndap pyrtuid u ya ka hapoh ka Revamped Distribution Sector Scheme yow man noh ko kam ka chnong wow em bordiñ ha waroh ki yung.
Da ong u leh wa du hadien kattu katni bnai donhi ye ki u khut Tender wei pyn hapoh uni hi u snem wow taan bordin lyngba kani ka Scheme cha kani ka chnong.
Neiliang yong ka seiñ dap ko dei sñiawngooh ya uni u sahep kamjooh ya ka chnat yong oo wa da smat ko wow chimkhia yeini i kaam neibhah kiwa chong chnong ka Madan Pohkseh da maad ki yei eh i khoo ymtoh de iwa ke wei da yooluti leh wa kamwa kular hapoh uni u snem u yoh bordiñ noh kani ka chnong.
Discussion about this post