Shillong: Ka Joint Action Committee (JACM) yong ka chnong Mawlai kawa booddien ya i chah pynyap u (L) Dismarlin Lyngdoh Lyngkhoi ha kiwa yah truck yong ka Saikia Company, da pynman ki ya ka lai paidbah na Nongkwar cha Mawroh ha Mawlai ynnne ka sngi.
U Dismarlin da chah pynyap u ha ka 24 tarik uni u bnai ha kiwa yah truck ha Warehouse wa em ha 10Mer, Ri-Bhoi.
Ha kani ka lai paidbah da yachim bynta lang da ki Rangbah Shnong, ki seiñ manbei, ki khynroo ka chnong, seiñbhalang kamjooh leh kiwa chong chnong ka Mawlai, nalor ki khynnah skur.
Ka lai paidbah da sdang ko na i por 1 waje i sngi na Mawlai Nongkwar wei da pynkut ha Mawlai Mawroh deiwa rah lang ya ki kot rben wa beiñ ya iwa jia wei wow dawa yei bichaar wa hok. Da em leh ka thang mombati ha katai ka thaw.
Kiwa yahkhamt ka JACM da lai e ki leh ya ka dorkhat ha u General Manager ka Food Corporation of India (FCI) u Deb Anand ha Mawroh wei hadien ini da pyman ya ka yalang paidbah ha madan Mawroh hi.
Neiliang u Donbok Kharlyngdoh da ong u wa ka JACM ka da dawa ko wa hapoh chi bnai, ka Saikia Company kawa yoh kaam Contract na ka FCI wow wan e kti ya ki 4 ngut ki kiwa emkti wow chim ya i mynsien yong u Dismarlin wei lada ym wanrah ki, toh u pyndam noh yei e kaam Contract ya ka Saikia Company.
Da dawa leh wow e kreh ya uwi na ki khon u Dismarlin ha ka FCI wei wow beh kreh chipor ya ki ar ngut ki wakreh kiwa khlem yarap ya u Dismarlin, kamjooh ya uwa pait ya ka Warehouse.
Discussion about this post