Jowai: Hadien wa mih i ujor pyrchah ya u Dolloi ka Elaka Nartiang u Hepsing Dhar wa da slaitbor u ya kawi ka manbei haka 30 tarik u bnai wa dep ha yung ka beiheh yong ka deiwa chim kabu lyngba ki kaam e dawai Kabiraj yong oo, kamtæ ynne ka sngi neiliang kiwa chong chnong ka Nongjngi, West Jaiñtia Hills District hapoh i yahkhmat ka seiñ FKJGP Khadarshnong Nongjngi deilang wa kiwi ki seiñbhalang wa kynthup yaka JSM, HYC, HNYF wa kiwi ki seiñ da ya mih paidbah ki wow pyrchah yei kaam wa sih u Dolloi ka Elaka Nartiang deiwa ya lai paidbah deilang wa i rah lama yong nadooh na Khliehshnong hadooh ha Ionglwit, Nongjngi.
Ha kani ka lai paidbah, da iwi i sur nadooh ki seiñbhalang wa kiwa chong chnong da dawa ki yaki bor pulit wow pynjoor i thooh wei kem syndon ya u Dolloi neibhah hadooh kattæ dang yut rieh u, wei u pynchitom leh katkam ka aiñ.
Heijooh i por da dawa leh naka JHADC wow pyndam noh syndon yei man Dolloi yong oo neibhah wym em man chngaaiñ wow man u kam uwa shynchaar yaka Elaka.
Neiliang u President ka FKJGP Jaiñtia Hills Zone u Tuesday Lytep da ong u wa lada ki pulit kreh chitom ki, ym eh wow yoh kem ya u Dolloi. Heijooh i por kyntu u yaki Politician leh wym toh u yada ki ya kam uni u jaitbru tangwa toh u pyrkhat neibynta i chongsuk chong chngaaiñ ki khynnah ki kynthai waka jaitbru hi waroh kawi, wei hei yong sakhiat kam u pa ka Elaka hi waroh kawi toh u pynyoo u yaka luti wa bha hantæ mar dei kylla da yah luti u ya ki kaam wa sih.
U General Secretary ka JSM u P. Phawa ong u wa kani wymtoh de ka sien nyngkong wa uni u Dolloi leh u ya ki kaam sih pyrchah yaki khynnah kynthai tangwa boon hi wym nood ki u wan chakhmat. Kamtæ lyngba i em kam kini ki kynthai wa mih chakhmat kiwi won leh daw chlur ki.
Kiwi won ki seiñbhalang wa e yei klam da beiñ joor ki yeini i jia wa kynthup ya ka Nidaialam Dkhar, General Secretary Women’s Wing JSM, ka President Women’s Wing FKJGP ka Ibawanpyntngen Law, u Riyoo Pulang President FKJGP Khadarshnong Nongjngi, u Wanbun Dkhar wa kiwi.
Neiliang ki waheh dong yong ki dong waphær waphær ka Nongjngi leh da kyntu joor ki yaki seiñbhalang wow booddien ki ya kani ka kaam wei u yakrehlang chirup wa ka chnong khnang yow ye u pynyoh yei hok yong ka manbei wa chah thombor.
Heijooh i por da rai leh wa lada ka sorkar ym pynchitom ko ya uni u Dolloi daw pyrkhat ki yow chim da kawi won ka luti.
