Ki soo tylli ki chnong wa em hapoh ka Sumer Elaka wa kynthup ya ka chnong Pala, Kseh, Muknor, Khahnar deilang wa ka EJNC-Sumer Circle, ha ka 15 tarik uni u bnai da pynman ki ya ka lai paidbah deilang wa i rah lama rong yong yow dawa pynchna noh ya u sarok wa lai luti na kini ki chnong uwa da sih cha palat pood.
Ya kani ka lai paidbah kawa da e pyrtuid Black Flag Peace Rally da pynman nadooh Lad Sutnga hadooh u mot sahnam u Kiang Nangbah wa em ha pchem ka yung krehkaam u DC, Khliehriat.
Ha kani ka sngi da phah leh ya ka dorkhat cha u Montri ka PWD (Roads) lyngba u DC yow dawa pynchna smat noh ya uni u sarok.
Ha ka dorkhat da ong wa da em du uni donhi u sarok wa pynyabi ya ki soo chnong wa ka Samasi kamjooh ya kiwi ki chnong yow poi cha u sarokbah yow lai cha Khliehriat lyngba ka chnong Jalaphet.
Da pyntip wa da em leh palat 10 tylli ki chnong hapoh ka Sumer Elaka kiwa da emkaam ya uni u sarok uwa da man kam u budloom uwa da chah ieh khlem pynchna kattu da boon snem wei u wym man de u lai kari khamtam ha ki por wa slap.
Chooh chooh da pyntip leh wa kiwa boon na ki bru wa im cha kini ki thaw toh ki warep kiwa lai dai ya ki mar yong ki cha ki yaw wa em ha Khliehriat, Sutnga, Sookilo, Ladrymbai wa kiwi de tangwa neidaw wa sih ware uni u sarok da pyndooh nong ko ya ki warep kani ka thaaiñ neidaw wym ye u pynpoi ya ki mar rep cha ki yaw ki haat.
Najrong ini, da chem chitom leh manda em kiwa kjut wa chitom yow ye u kit cha ki thaw sumaar heiwa kawa jan dooh ka thaw sumaar toh ka Sutnga CHC kawa jngai 40 Km na Mooknor cha Sutnga.
Da pynkynmoo leh ya ka sorkar neidaw wa joor sih uni u sarok, ha ka 08-03-2017 da dooh yei mynsien ki 3 ngut ki bru wei da mynsoo 39 ngut hadien wa kylla ka kari kamtæ da kyrpaad ya u Montri ka PWD (Roads) wow chimkhia yeini i chem chitom ki paidbah.
