Kam chibynta wow pynsñiawthooh paidbah yei emkaam ki bru wa duna hei bor khmat, ynne da pynman ya ka World White Cane Safety Day ha Jowai heiwa da wan chimbynta da kiwa boon wa em i duna hei bor khmat heiwa da pynman leh yei lai paidbah.
“Kiwa em i duna hei bor khmat da chem chitom ki neidaw wa ki paidbah ym pu tip ki chaphang u dieñ chdooh wa lieh,” da ong u Rimiki Pajuh uwa da pynlai ya ka yalang pynemburom ya ka sngi yada ya kiwa ksoh ya u dieñ chdooh rong lieh (World White Cane Safety Day).
Kiwa yah Taxi wei wot ki pulit wa pynlai kari leh ym pu bna ki iyi iyi leh chaphang u dieñ chdooh rong lieh, da ong kiwa em hei duna i bor khmat.
I chem chitom ki toh wot hawa lai wa wan neibhah ym em chna ya ki luti ki syngkieñ wa ye ki u pynemkaam wot ha ki yung krehkaam sorkar wei wot ki bru leh ym em ki yei mynsien yarap, da ong u Rimiki Pajuh uwa mihkhmat ya kini wa duna hei bor khmat.
U Jitendra Dkhar uwa man u Director yong ka Blind Lead Trust da ong u wa da em hadooh 13, 532 ngut hapoh ka jylla kiwa duna hei bor khmat. Wei da chah chim kabu ki hadooh wa em kiwa knieh Mobile, kiwa tooh poisa ki ha ki damok wei kiwa yah kari leh ym em u burom ki manda yoo ki ya kiwa rah dieñ chdooh.
Hadien wa pynman ya ka lai paidbah nadooh na Stand War wa em hajan ka yung krehkaam u DC, Jowai hadooh wa poi ha Indoor Stadium ka Ladthadlaboh heiwa ha tymbud luti da saam leh ya ki kot lakdop yow pynsñiawthooh paidbah, da pynman ya ka yalang heiwa ka D. Syngai kawa man ka ADC yong ka West Jañtia Hills District da man ko kam ka kongsan wei da ong ko wa neiliang ka sorkar da leh ko chiboon ki kaam wow pynsuk ya kiwa em i duna hei doh i pran wei dang em chooh chooh chiboon wa dang toh u leh.
Da ong ko leh wa lyngba ka SSA da wanrah chiboon ki yarap ya ki khynnah kiwa em i duna hei doh i pran wei ha ka Election neini chakhmat daw pynsuk ya kiwa em i duna hei doh i pran. Da pynsñiaw ko leh yei sñiawkmen wa ka dhab tem yong kiwa em i duna hei bor khmat wa yahkhmat da u Micky Pajuh kawa e pyrtuid ka “Life After Dark” da chah jied ko ha ka Election Commission wow mihkhmat ya ka jylla cha Delhi.
Ha kani ka sngi da yoh leh yei klam na u Wympherheimonki Lamare uwa man u Acting Secretary yong ka seiñ Blind Lead Trust. Kiwi wa klam ha kani ka sngi toh ka Bandwina Khymdeit wa u Kajentan Lypon kiwa man ki dkhot yong ka seiñ. Da yoh leh yei rwai na kiwa em i duna hei bor khmat wa i chaad na ka Josila Makdoh ka wym ye u chynna iyi iyi leh.
Ha ka lai paidbah da wan wow synran leh da ki khynnah ka Thomas Jones College waka Kiang Nangbah College wa kynthup ya ki NCC yong ka Thomas Jones Synod College, Jowai.
