Ka Committee on Empowerment of Women, hei yahkhmat ka Santa Mary Shylla kam ka Chairperson, ynne da lai pait ki ya kawi ka manbei kawa da chah thang pyn ha u kurim ko ha chnong Niriang wa em hapoh Thadlaskein Block ka West Jaiñtia Hills District.
Kani ka manbei em ko 6 ngut ki khon wa kynthup ya iwi iwa dang chi snem chiteiñ.
Ya ka Chairperson da synraan da ki dkhot ka Committee wa kynthup ya ki MLA, u Adelbert Nongrum wa u Wailadmiki Shylla deilang ki sahep ka Meghalaya Legislative Assembly Secretariat.
Neiliang ka Santa Mary Shylla da pynsñiaw ko yei khyrngiat wei sñiawsih yeini wa da jia iwa da pynthut ya ka imlang sahlang wei da kular ko leh wa deiwa ya krehlang wa u MLA ka thaaiñ, daw pyntikna wa kani ka manbei u yoh ko yei sumaar wa bha tam.
“I kha ko toh kiwa daw chimpor da ki bnai hadooh da ki snem wow bha ki tangwa u em bait i ha chrooh yong ka ha ini i por kamjooh wa kiwa ha-yung ha-sem ko,” da ong ka Santa.
Da kyntu ko leh ya ki pulit wow pynman ya ka takit wa bniah wei wow pynchitom deiwa khor ya uwa emkti ha ini i kaam.
Neiliang u Adelbert Nongrum da kular u wa ka Committee daw booddien ko yeini wei da ngait skem u wa ka sorkar deilang ki bor ka aiñ daw leh ki yei kaamram yong ki yow pynchitom ya kiwa emkti ha ini i kaam.
Da ong u leh wa man i kaamram yong uwi pa uwi yow pait yei miat i bha yong kiwi wei ymtoh u suki hi-eh manda jia kam ini yow lait ki u jia ma jia.
Neiliang u Wailadmiki Shylla da khana u ya kiwa boon ki Scheme wa e yarap da ka sorkar jylla deilang ka sorkar pyrdi wa kynthup ya ka Ayushman Bharat wa ka Victim Compensation Scheme.
Da khana u wa hapoh ka Victim Compensation Scheme ye u yoh yarap Rs. 3 lak hadooh Rs. 7 lak. “Nga da dep kylli O yeini chwa u poi heini ynne deiwa yaklam wa ki Legal Service Authority, wei da kyntu ya ki wow e smat ki yei yarap,” da pyntip u Wailadmiki.
Discussion about this post