Shillong: Kiwa yahkhmat ka Confederation of Meghalaya Social Organisation (CoMSO) ynne ka sngi da lai pait ki yow sñiawlem ya kiwa da mynsoo na i yakhih kawa man ynnin ka sngi hakhmat ka yung sah u Lat ka jylla.
Kam wow pynkynmoo wa ha kani ka yakhih pyrchah ya ka Citizenship Amendment Act (CAA), 2019 wei kamjooh wow dawa ya ka Inner Line Permit (ILP) ha Meghalaya, da ki phaw ngut ki paidbah da mynsoo ya kiwa da pynkit noh cha Shillong Civil Hospital.
Neiliang ka CoMSO da e khublei ko ya kitu kiwa yarap wow lehbha ya kiwa mynsoo ha katai ka jia, khamtam ya kiwa sumaar wa kiwa pynlai ka Civil Hospital kiwa da chimkhia deiwa e yarap smat ya kiwa mynsoo.
U Chairman ka CoMSO, u Robertjune Kharjahrin da beiñ joor u ya ki bru kiwa chim kabu wei wow kem ya kiwa pynmih kulmar ha katai ka sngi katwa dang pynman yaka pyrchah kawa da wanrah i awri hapyrdi ki paidbah wa ki pulit. Ha i jooh i por da kyntu leh ya kitu kiwa da mynsoo wa ym toh wow dooh mynsien deiwa pynsñiaw yei kyrmen lyngba ini i mylliñ yei yong ki samen, deiwa ong wa ha kawi ka sngi, ka jylla daw yoh ko ya ki aiñ wow yada na i wan tyllep ki mynder.
Neiliang u Donbok Kharlyngdoh ha iwi i liang da beiñ u yei leh embor ki pulit, khlem da burom chooh ya ki paidbah wa emlang ki tymmen wa ki kynthai. Da beiñ chooh chooh u ya uwi u pulit uwa da mynsoo ha itai i jia neibhah wot neiliang ki dkhot ka CoMSO da pyrchang ki wow lai yarap, da siat pathan u da ka suloi cha madan wow pynyoo yei em yong oo kawa da wanrah leh ya i mynsoo ya ki bru.
Da ong u wa ki pulit ym toh wow yakhun da ki tiar wow pynmynsoo ya ki paidbah neibhah ka yakhun ym toh pyrchah ya ki pulit næ ya ka sorkar jylla.
Discussion about this post